ՀՀ մշակոյթի նախարարութեան «Արցախ, ի΄մ սէր. աջակցենք Ստեփանակերտի թատրոնին» բարեգործական ծրագիրին ծիրէն ներս Մարտ 27-ին՝ ժամը 19:00-ին, «Արամ Խաչատրեան» համերգասրահին մէջ, տեղի պիտի ունենայ Հայաստանի պետական ազգային ակադեմիական երգչախումբին համերգը: Այս մասին կը հաղորդէ ՀՀ մշակոյթի նախարարութիւնը։
Ելոյթ պիտի ունենան մենակատարներ Սարգիս Աղամալեանը (թենոր) եւ Արծուիկ Դեմուրճեանը (սոփրանօ):
Համերգին ընթացքին պիտի հնչեն հայ, ռուս եւ արեւմտաեւրոպական երգահաններու ստեղծագործութիւններ (Կոմիտաս, Ք. Կարա-Մուրզա, Ա. Պապաճանեան, Է. Յովհաննիսեան, Բ. Կանաչեան, Տ. Չուխաճեան, Է. Սահառունի, Մ. Եկմալեան, Պ. Չայքովսկի, Վ. Ա. Մոցարթ, Ճ. Վերտի, Շ. Կունօ, Գ. Օրֆ, Ճ. Ռոսսինի):
Համերգը պիտի ղեկավարէ ՀՀ Ազգային հերոս, ԽՍՀՄ ժողովրդական արուեստագէտ, Հայաստանի պետական ազգային ակադեմական երգչախումբի գեղարուեստական ղեկավար եւ գլխաւոր խմբավար Յ. Չեքիճեանը: Քոնսերթմայսթըր՝ Ա. Թուրապեան:
ՀՀ մշակոյթի նախարարութեան «Արցախ, ի՛մ սէր. աջակցենք Ստեփանակերտի թատրոնին» ծրագիրին ծիրէն ներս ՀՀ մշակոյթի նախարարութեան ենթակայութեան թատերա-համերգային կազմակերպութիւնները մէկ ներկայացում կամ համերգ պիտի նուիրեն Ստեփանակերտի Վ. Փափազեանի անուան պետական դրամատիկական թատրոնին` տոմսերու ամբողջ հասոյթը տրամադրելով թատրոնի շէնքին վերանորոգման:
