ՀՀ սփիւռքի նախարարութեան Մերձաւոր եւ Միջին Արեւելքի հայ համայնքներու վարչութեան պետ Լեւոն Անտոնեան Sputnik Արմէնիա մամուլի կեդրոնին մէջ խօսած է Հայաստան եկած սուրիահայերուն օգնելու մասին:
Հայաստանի կառավարութիւնը փորձած է ամէն ինչ ընել սուրիահայ փախստականներուն անհրաժեշտ պայմաններ ապահովելու համար: Իշխանութեան այս հարցով օգնած են ինչպէս Հայաստանի, այնպէս ալ մեր երկրի սահմաններէն դուրս գործող տարբեր հասարակական կազմակերպութիւններ:
Անտոնեան նշած է, որ 2017 թուականի վերջը մօտ 20 սուրիահայ ՀՀ քաղաքացիութիւն ստացած է: Եւս 600 ընտանիք, սփիւռքի նախարարութեան տուեալով, կը մտածէ Հայաստան տեղափոխուելու մասին:
2017 թուականի տուեալները կը վկայեն, որ սփիւռքի նախարարութիւն դիմած սուրիահայերու մեծ մասը առողջութեան հետ կապուած խնդիրներ ունեցած է:
«Ընդհանուր առմամբ 2017 թուականին 1262 սուրիահայ դիմած է նախարարութիւն: Դիմողներէն 722-ը առողջութեան հետ կապուած հարցեր ունէին: Ատոնք մեծ մասամբ լուծուած են պետպատուերի ծիրէն ներս, իսկ որոշ պարագաներու, երբ մեծ ծախսեր կը պահանջուէին (սրտի վիրահատութիւն, դեղերու գնում, փրոթեզներ) մենք դիմած ենք մեր գործընկերներուն, բարեգործական կազմակերպութիւններուն», —armeniasputnik.am-ի փոխանցմամբ ըսած է Լեւոն Անտոնեան:
