Հադրութի մշակոյթի եւ երիտասարդութեան հարցերու բաժինի նախաձեռնութեամբ Հադրութ քաղաքին մէջ կազմակերպուած է «Ճանչցիր զիս` իմ ունակութիւններով» խորագիրով մանկապատանեկան նկարչութեան մրցոյթ` նուիրուած Արցախեան շարժման 30-րդ տարեդարձին:
Ըստ «Արցախփրես»-ի՝ Հադրութի շրջվարչակազմի աշխատակազմի մշակոյթի եւ երիտասարդութեան հարցերու բաժնի վարիչ Երազիկ Հայրիեան ըսած է, որ մրցոյթին մասնակցած է Հադրութ քաղաքի եւ շրջանի համայնքներու 6-13 եւ 14-18 տարիքային խումբերու աւելի քան 100 երեխայ:
Անոր խօսքով` ներկայացուած աշխատանքները պէտք է արտայայտէին Արցախեան շարժման 30-ամեակի իմաստն ու էութիւնը, հոգեբանական տրամադրուածութիւնը, զգացմունքային լիցքը:
Մրցոյթին ներկայացուած աշխատանքները ուղեկցուած են կարճ բացատրութիւններով. ի՞նչ պատկերուած է, ո՞րն է աշխատանքին մէջ տեղ գտած մշակոյթի տարրը եւ ինչպիսի՞ն է հեղինակի վերաբերմունքը աշխատանքի նկատմամբ:
Ըստ անոր` մրցոյթի նպատակն էր` նպաստել երեխաներու հայ ազգագրութեան, երկրագիտութեան իմացութեան, անոնց կողմէ ազգային աշխարհայեացքի, առանձնայատկութիւններու, գեղագիտական արժէքներու իւրացման, պատմական իրադարձութիւններու եւ յաղթանակի տօնի փաստերու արժեւորման:
Մրցոյթի լաւագոյն աշխատանքներուն հեղինակները պարգեւատրուած են պատուոգիրներով ու նուէրներով:
