Թէեւ երեւանեան անոր հասցէն Կողբացի 42-ն էր, սակայն ան այնքան յաճախ կը մեկնէր արտասահման շրջագայութիւններու, որ երբեմն կը կատակէին. «Եկած է Հայաստան` հիւրախաղերու»:
Խօսքը, ի հարկէ, հայ հոգեւոր երգի անզուգական կատարող Լուսինէ Զաքարեանի մասին է: Եթէ ամէն բան ընթանայ ըստ նախատեսուածի, ապա շուտով իրականութիւն պիտի դառնայ անոր տունը թանգարանի վերածելու երկար տարիներու հանրային պահանջքը:
Ճիշդ է, տունը մասնաւոր սեփականութիւն է, սակայն ժառանգներու` Լուսինէի ամուսինին` Խորէն Պալեանի եղբօրորդիներու համաձայնութեամբ ու անմիջական մասնակցութեամբ բնակարանը յառաջիկային պիտի գործէ որպէս հիմնադրամ-թանգարան, որ իր դռները պիտի բանայ Յունիս 1-ին` երգչուհիին ծննդեան օրը:
