Արցախի եւ Ազրպէյճանի սահմանագիծին վրայ Ազրպէյճանի նախաձեռնած հետախուզական ներթափանցման վերջին փորձը նպատակ ունի այդ երկրին մէջ միջազգային հանրութեան ուշադրութիւնը շեղելու մարդու իրաւունքներու ոտնահարումներէն:
Ըստ «Armenpress.am»-ի՝ այս մասին թուիթըրի իր էջին գրած է ՀՀ Արտաքին գործոց նախարարութեան խօսնակ Տիգրան Բալայեանը:
«Պաքու կը փորձէ փոխարինել դիւանագիտութեան մէջ եւ միջազգային հարթակի վրայ իր ձախողումները, շեղել ուշադրութիւնը Ազրպէյճանի մէջ մարդու իրաւունքներու եւ հիմնարար ազատութիւններու խախտումներէն` սահմանագիծին վրայ սադրանքներ կազմակերպելով: Պիտի չյաջողի»,- գրած է ՀՀ ԱԳՆ խօսնակը:
Յիշեցնենք, որ արցախա-ազրպէյճանական հակամարտ զօրքերու սահմանագիծի հարաւ-արեւելեան (Կուրոպատկինօ) ուղղութեամբ տեղակայուած հայկական դիրքերէն մէկուն պաշտպանական հատուածին վրայ Յունուար 24 լոյս 25-ի ժամը 02:00-ի սահմաններուն ՊԲ առաջապահ ուժերու կողմէ հաւաստանշուած է հակառակորդի հետախուզական խումբի ներթափանցման փորձ: Ձեռնարկուած կանխարգելիչ գործողութիւններուն իբրեւ արդիւնք՝ ազրպէյճանական յատուկ ջոկատայինները ետ շպրտուած են: Ըստ նախնական տուեալներու` հակառակորդին կողմէ կան կորուստներ: Մանրամասնութիւնները պիտի ճշդուին:
