Թիֆլիսի Կովկասեան տան մէջ Յունուար 8-ին տեղի ունեցած է Սերկէյ Փարաջանովին նուիրուած ստեղծագործական մրցոյթի յաղթողներու պարգեւատրման հանդիսաւոր արարողութիւնը, որ կազմակերպուած է Վրաստանի մէջ ՀՀ դեսպանութեան եւ «Վիրահայերու միութիւն» հասարակական կազմակերպութեան կողմէ:
Վրաստանի մէջ ՀՀ դեսպանատան տեղեկութիւններով՝ ձեռնարկին մասնակցած են Վրաստանի մէջ ՀՀ արտակարգ եւ լիազօր դեսպան Ռուբէն Սադոյեան, Վրաստանի` Հաշտեցման եւ քաղաքացիական հաւասարութեան նախարարի առաջին տեղակալ Լաշա Տարսալիան, հոգեւոր դասի ներկայացուցիչներ, մտաւորականներ, վիրահայ համայնքի շարք մը ներկայացուցիչներ:
Ժիւրիի որոշումով ստեղծագործական մրցոյթի «Ոսկէ դափնեկիր»-ի կոչման արժանացած է Դինադին Պուգիան, առաջին տեղը գրաւած է Եուլիա Չալունելին, երկրորդը` Գոհար Յակոբեանը, իսկ երրորդը` Լեւան Ցալուկելաշվիլին:
«Ոսկէ դափնեկիր»-ի կոչման արժանացած Դինադին Պուգիային դեսպան Սադոյեան պարգեւատրած է պատուոգիրով եւ յանձնած Հայաստան այցելութեան եռօրեայ ուղեգիր, ուր ան հնարաւորութիւն պիտի ունենայ այցելելու տեսարժան վայրեր եւ ծանօթանալու Հայաստանի պատմամշակութային հարուստ ժառանգութեան:
Պատուոգիրեր յանձնուած են նաեւ մրցանակային այլ տեղեր զբաղցուցած մասնակիցներուն:
Նշենք, որ Սերկէյ Փարաջանովին նուիրուած ստեղծագործական մրցոյթը տեղի ունեցած է 2017 Հոկտեմբեր 15-Դեկտեմբեր 28, որուն ընթացքին երեք տասնեակէ աւելի հայ եւ վրացի նկարիչներ հանդէս եկած են իրենց հեղինակային ստեղծագործութիւններով: Յաղթողին տրամադրուած ուղեգիրի բոլոր ծախսերը պիտի հոգայ Վրաստանի մէջ ՀՀ դեսպանութիւնը:
