Արցախի Հանրապետութեան նախագահ Բակօ Սահակեան Հայաստանի Հանրապետութեան նախագահ Սերժ Սարգսեանի հետ միասին Դեկտեմբեր 4-ին այցելեցին Արցախի կեդրոնական եւ արեւելեան մասերուն մէջ տեղակայուած շարք մը զօրամասեր, ծանօթացան զինուորներու ծառայութեան ընթացքին:
Նախագահները դիտեցին զօրավարժութիւններ, ներկայ գտնուեցան շարք մը զօրանոցներու եւ այլ կառոյցներու բացման հանդիսաւոր արարողութիւններուն:
Նոյն օրը Ստեփանակերտի մէջ անոնք Մարշալ Բաղրամեանի ծննդեան 120-ամեակի առիթով ծաղկեպսակներ դրին անուանի զօրավարի յուշարձանին:
Նշենք, որ Նախագահ Սերժ Սարգսեան աշխատանքային այցելութեամբ մը շաբաթավերջէն ի վեր կը գտնուէր Արցախ:
Նախագահ Սարգսեան Արցախի նախագահ Բակօ Սահակեանի հետ այցելած է պաշտպանութեան բանակի հրամանատարութեան կեդրոն, ուր տեղի ունեցած է աւանդաբար կազմակերպուող տարեվերջեան խորհրդակցութիւնը` Հայաստանի Հանրապետութեան եւ Արցախի Հանրապետութեան պաշտպանութեան նախարարներու եւ բարձրաստիճան հրամանատարական կազմի ներկայացուցիչներու մասնակցութեամբ: Քննարկուած են բանակաշինութեան վերաբերող հարցեր: Խորհրդակցութեան մասնակիցները լսած են պաշտպանութեան բանակի հրամանատարին զեկուցումը:
