Թուրքիան պէտք է շարունակէ հնարաւորինս հեռու մնալ Լեռնային Ղարաբաղի հակամարտութեան կարգաւորման գործընթացէն: Այս մասին, ըստ Armenpress.am-ի, յայտարարած է Հայաստանի արտաքին գործոց նախարարութեան խօսնակ Տիգրան Բալայեանը` մեկնաբանելով ՌԴ նախագահ Վլատիմիր Փութինի հետ հանդիպումէն ետք թուրք լրագրողներուն Թուրքիոյ նախագահ Էրտողանի ըրած յայտարարութիւնը:
«Այդ մեկնաբանութիւնները կրկին ի ցոյց կը դնեն, որ Թուրքիոյ մէջ լուսային տարիներով հեռու են ղարաբաղեան հիմնախնդիրի էութենէն եւ բովանդակութենէն: Թուրքիան պէտք է շարունակէ որքան հնարաւոր է հեռու մնալ ԼՂ խնդիրի կարգաւորման գործընթացէն»,- ըսած է Բալայեան:
Նշենք, որ թրքական Star պարբերականը մէջբերած էր Էրտողանի խօսքերը՝ այցին վերաբերեալ: Թուրքիոյ նախագահը լրագրողներուն յայտնած էր, որ Փութինի հետ քննարկած է արցախեան հակամարտութեան հարցը: Ան կրկին յիշեցուցած էր 5 շրջաններու վերաբերեալ ՄԱԿ-ի բանաձեւերը:
