2018 թվականից ՀՀ բուհերում երկու նոր մասնագիտություն կներմուծվի: Բուհական մասնագիտությունների ցանկը վերանայելու որոշումն ընդգրկված է այսօր` հոկտեմբերի 19-ին, կայանալիք կառավարության նիստի օրակարգում: Մասնագիտությունների ցանկի վերանայման արդյունքում բուհերում կներդրվի «Դատական փորձաքննություն» և «Մեխատրոնիկա»` բակալավր և մագիստրոսի համապատասխան որակավորումներով:
Երևանում կանցկացվի «Մեքենայական ուսուցումը՝ գիտական հայտնագործությունների խթան» թեմայով միջազգային աշխատաժողով: Բացման խոսքով հանդես կգան ՀՀ վարչապետ Կարեն Կարապետյանը, FAST-ի համահիմնադիր Նուբար Աֆեյանը և այլք:
ՄԱԿ-ի հայաստանյան գրասենյակում կկայանա գործարար համաժողով՝ «Նոր բիզնես հնարավորություններ ՓՄՁ-ների համար Հայաստանում: Սովորելով շվեյցարական փորձից» թեմայով: Ներկա կլինեն Հայաստանի գործատուների հանրապետական միության նախագահ /ՀԳՀՄ/ Գագիկ Մակարյանը, ֆրանսախոս Շվեյցարիայի ձեռնարկությունների միության գլխավոր տնօրեն Բլեյզ Մաթեյը: Նախատեսված են կլոր-սեղան քննարկումներ B2B ձևաչափով:
«Զվարթնոց» պատմամշակութային արգելոց-թանգարանում տեղի կունենա «Հայ դասական պոեզիան Տիգրան Մանսուրյանի երաժշտության մեջ» խորագրով համերգ-երեկո: Մասնակցում է Հայաստանի պետական կամերային երգչախումբը: Համերգներն իրականացվում են ՀՀ մշակույթի նախարարության աջակցությամբ:
«Մոսկվա» կինոթատրոնում հանդիսավորությամբ կբացվի ճապոնական ֆիլմերի 12-րդ փառատոնը՝ նվիրված հայ-ճապոնական դիվանագիտական հարաբերությունների հաստատման 25-ամյակին: Փառատոնի կազմակերպիչներն են Հայաստանում Ճապոնիայի դեսպանությունը և Հայ-ճապոնական «Հիկարի» գիտակրթամշակութային կենտրոն» -ը:
Եվս մեկ երկրի հետ դիվանագիտական հարաբերությունների 25-ամյակի մասին: ՀՀ-ում Բրազիլիայի դեսպանատունը, ՀՀ մշակույթի նախարարության և Ալ.Սպենդիարյանի անվան օպերայի և բալետի ազգային ակադեմիական թատրոնի հետ համագործակցությամբ, հրավիրում է ունկնդրելու Բրազիլիայի և Հայաստանի միջև դիվանագիտական հարաբերությունների հաստատման 25-ամյակին նվիրված համերգը: Համերգի պատվավոր հյուրն է դիրիժար Ռիկարդո Ավերբախը (Բրազիլիա):
«Արամ Խաչատրյան» համերգասրահում Խաչատրյանի միջազգային փառատոնի շրջանակներում տեղի կունենա Սերժ Թանկյանի «Օրկա» սիմֆոնիայի հայաստանյան պրեմիերան։ Երեկոյի ընթացքում Հայաստանի պետական երիտասարդական նվագախմբի հետ ելույթ կունենա նաև դաշնակահար Լևոն Կարապետյանը՝ ներկայացնելով Արամ Խաչատրյանի դաշնամուրի կոնցերտը։
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում
