«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Ժնևում կայացավ Հայաստանի և Ադրբեջանի նախագահների հանդիպումը: Այսօր` հոկտեմբերի 17-ին, քաղաքագետներ, դիվանագետներ, հասարակական, քաղաքական գործիչներ կանդրադառնան հանդիպմանը տարածաշրջանային զարգացումների համատեքստում:
Երևանում Եվրոպայի խորհուրդը և Եվրոպական միությունը լրատվամիջոցներին կներկայացնեն Արևելյան գործընկերության անդամ երկրների, այդ թվում՝ Հայաստանի համար նախատեսված մի շարք ծրագրերի արդյունքները:
Կանցկացվի «Էլ-կառավարման համակարգերի մշակում արդարադատության ոլորտում» թեմայով քննարկում: Կմասնակցեն ՀՀ արդարադատության նախարար Դավիթ Հարությունյանը, ԵՄ պատվիրակության ղեկավար, դեսպան Պյոտր Սվիտալսկին և այլք:
Լրագրողների հետ կհանդիպի ԱԺ տնտեսական հարցերի մշտական հանձնաժողովի նախագահ Խոսրով Հարությունյանը: Նա կանդրադառնա տնտեսական, քաղաքական զարգացումներին, ինչպես նաև «Ընտանեկան բռնության կանխարգելման մասին» օրենքի նախագծին:
«Ընտանեկան բռնության կանխարգելման մասին» օրենքի նախագծի շուրջ քննարկումներ են սպասվում Ազգային ժողովում: Այն իրականացվում է ՀՀ ԱԺ եվրոպական ինտեգրման հարցերի մշտական հանձնաժողովի նախաձեռնությամբ:
Մամուլի ասուլիսով հանդես կգան ՆԱՏՕ-ի խորհրդարանական վեհաժողովում ՀՀ ԱԺ պատվիրակության անդամները: Վեհաժողովը կայացել է հոկտեմբերի 6-9-ը Բուխարեստում:
Հայաստանյան փորձագիտական դաշտը քննարկում է «Հայաստան- ԵՄ համապարփակ և ընդլայնված գործընկերության համաձայնագրի հեռանկարներն ու հնարավորությունները: Թեմայի վերաբերյալ իրենց վերլուծությունները կներկայացնեն Երևանի մամուլի ակումբի նախագահ Բորիս Նավասարդյանը, Միջազգային փորձագետ, Ազգային ժողովի արտաքին հարաբերությունների հանձնաժողովի նախկին նախագահ Հովհաննես Իգիթյանը, Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը:
Հոկտեմբերի 17-ն Աղքատության վերացման համար պայքարի միջազգային օրն է: Սոցիոլոգ Ահարոն Ադիբեկյանը և Սպառողների ասոցիացիայի նախագահ Արմեն Պողոսյանը կանդրադառնան թեմային և կներկայացնեն աղքատության վերաբերյալ վիճակագրական տվյալներ:
Մատենադարանում հոկտեմբերի 17-18-ը տեղի կունենա «Նարեկացիական ընթերցումներ» ամենամյա 3-րդ միջազգային «Գանձեր և Տաղեր» խորագրով գիտաժողովը: Այն նվիրված է Տիեզերական վարդապետ Գրիգոր Նարեկացու գրական ժառանգությանը:
Հայաստանի գրողների միությունում նշում է արձակագիր Ներսես Խառատյանի 70-ամյակը: Միջոցառման շրջանակում նախատեսված է գրքերի շնորհանդես:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
