«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Կառավարության մեկ տարվա գործունեությամբ պայմանավորված՝ գերատեսչությունները շարունակում են ամփոփիչ ասուլիսները: Այսօր` սեպտեմբերի 25-ին, լրագրողների հետ կհանդիպիսի ՀՀ ֆինանսների նախարար Վարդան Արամյանը: Նա կներկայացնի նախարարության մեկ տարվա գործունեության արդյունքները:
Երևանում կանցկացվի «Արևելյան գործընկերության ապագան. մարտահրավերներ և հեռանկարներ» թեմայով քննարկում: Քաղաքացիական հասարակության ներկայացուցիչները կներկայացնեն իրենց տեսակետները ԵՄ-Հայաստան հարաբերությունների վերաբերյալ: Ներկա կլինեն Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը, Շվեդիայի միջազգային ազատական կենտրոնի գլխավոր քարտուղար Մարտին Էնգեբին և այլք:
Երևանում է ՌԴ ԿԳ նախարար Օլգա Վասիլևան: ՀՀ ԿԳ նախարար Լևոն Մկրտչյանի հետ հանդիպումից և Ծիծեռնակաբերդի հուշահամալիրում ծաղկեպսակ դնելուց հետո, Օլգա Վասիլևան կայցելի Խաչատուր Աբովյանի անվան հայկական պետական մանկավարժական համալսարան: Նա հանդիպում կունենա ռուսերեն լեզվի դասախոսների և Երևան քաղաքի ռուսերեն լեզվի խորացված ուսուցում իրականացնող դպրոցների ուսուցչական կազմի հետ:
Հայաստանյան փորձագետները քննարկում են ՄԱԿ-ի Գլխավոր Ասամբլեայի 72-րդ նստաշրջանում հնչած ելույթները, ՀՀ ԱԺ պատվիրակության՝ Բաքու կատարած այցելությունը: Իրանագետ Արտյոմ Տոնոյանը, ադրբեջանագետ Աշոտ Մովսիսյանը կանդրադառնան թեմային: Քաղաքագետ Ալեքսանդր Իսկանդարյանն էլ իր դտարկումները կներկայացնի արցախյան հիմնախնդրի շուրջ ծավալվող վերջին զարգացումների մասին:
Գիտությունների ազգային ակադեմիայում կանցկացվի «Կոմպյուտերային գիտություն և ինֆորմացիոն տեխնոլոգիաներ-2017» (CSIT-2017) միջազգային գիտաժողովը:
Հայաստանի ազգային գրադարանում հանդիսավորությամբ կբացվի Գրատպության թանգարանը: Ներկա կլինի ՀՀ մշակույթի նախարար Արմեն Ամիրյանը, ով կպատմի, թե մշակութային ինչ ձեռնարկներ են իրականացվելու առաջիկայում և որոնք են արդեն իրականություն դարձել կառավարության մեկ տարվա գործունեության ընթացքում։
Կոմիտասի անվան կամերային երաժշտության տանը տեղի կունենա Սփյուռքի նախարարության «Երգում ենք Կոմիտաս» համահայկական փառատոնի բացման արարողությունը: Փառատոնին կմասնակցեն Հայաստանից, Արցախից և աշխարհի 12 երկրներից ժամանած երգչախմբեր և մենակատարներ: Փառատոնի բացմանը ներկա կլինի Սփյուռքի նախարար Հրանուշ Հակոբյանը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
