Հայաստանի պետական տնտեսագիտական համալսարանի (ՀՊՏՀ) 200 ուսանողներ սեպտեմբերի 21-ի օրամուտը դիմավորեցին «Եռաբլուր» փառքի պանթեոնում:
ՀՀ Անկախության օրվան ընդառաջ բուհի ուսանողական խորհրդի և Հայաստանի երիտասարդական հիմնադրամի նախաձեռնությամբ անցկացված միջոցառման շրջանակներում Եռաբլուրում ուսանողները նախ ծաղկեպսակներ դրեցին զոհված ազատամարտիկների շիրիմներին, այնուհետև կազմակերպվեց մոմավառություն և ոգեկոչման արարողություն, իսկ հոգևոր այրերի առաջնորդությամբ կատարվեց սուրբ աղոթք: Մակրոտնտեսության ամբիոնի թեկնածու, դասախոս Հարություն Արզումանյանի շուրթերով հնչեց Հայաստանի Հանրապետության անկախության հռչակագիրը, ինչին հաջորդեց ՀՀ օրհներգի միասնական կատարումը ուսանողների կողմից:
ՀՊՏՀ ուսանողական խորհրդի նախագահ Հովհաննես Հարությունյանը, խոսելով ծրագրի նպատակի մասին, ասաց. «Մենք քանի որ շատ ենք արժևորում անկախության գաղափարը, մեզ համար կարևոր են այն հերոսները, որոնք իրենց կյանքի գնով նվիրեցին մեզ այս անկախությունը»:
«Արմենպրես»-ի հաղորդմամբ՝ Հովհաննես Հարությունյանը տեղեկացրեց, որ 2014-ից իրականացվող ավանդական այս ծրագիրը տարեցտարի ավելի շատ ուսանողների է համախմբում: Ուսանողական խորհրդի նախագահն ասաց, որ այս տարի բացի այն, որ աճել է Եռաբլուրում սեպտեմբերի 21-ի օրամուտը դիմավորող երիտասարդների թիվը, աճել է նաև մասնակից աղջիկների թիվը: Հովհաննես Հարությունյանը նշեց. «Եթե 2014-ին մեկ աղջիկ էր մեզ հետ Եռաբլուրում, ապա այս տարի նրանք էին մեծամասնությունը»:
