Ջերմուկում իրականացվող բարեկարգման աշխատանքների ընթացքը գնահատելու և ՀՀ վարչապետ Կարեն Կարապետյանի՝ հանրապետության տարածքում գտնվող կիսակառույց ու անավարտ օբյեկտների հետագա ճակատագրի վերաբերյալ ՀՀ կառավարություն առաջարկներ ներկայացնելու հանձնարարականի համատեքստում ՀՀ ԿԱ քաղաքաշինության պետական կոմիտեի նախագահ Նարեկ Սարգսյանը նախօրեին աշխատանքային այց է կատարել ՀՀ Վայոց ձորի մարզի Ջերմուկ քաղաք: Այս մասին «Արմենպրես»-ին տեղեկացրին ՀՀ կառավարությանն առընթեր քաղաքաշինության պետական կոմիտեի մամուլի ծառայությունից:
Քաղաքի պատասխանատուների, ինչպես նաև՝ շինարարների և նախագծողների մասնակցությամբ շինհրապարակում անցկացրած խորհրդակցության ընթացքում Ն. Սարգսյանը համապատասխան կառույցների հետ քննարկել է ինչպես քաղաքի բարեկարգման ծրագրերը, այնպես էլ՝ Ջերմուկում տարիներ շարունակ գոյություն ունեցող կիսակառույց շինությունների վերաբերյալ հարցերը:
