«Արմենպրես»-ը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Սեպտեմբերի 18-20-ը Երևանում կկայանա «Փոխադարձ վստահություն, միասնականություն և պատասխանատվություն» Հայաստան-Սփյուռք վեցերորդ համահայկական համաժողովը: Հայաստանից, Արցախից և Սփյուռքից համաժողովին մասնակցելու համար հրավիրվել են պետական բարձրաստիճան այրեր, հասարակական-քաղաքական գործիչներ, համահայկական կառույցների և համայնքներում գործող կազմակերպությունների ղեկավարներ ու ներկայացուցիչներ:
Հայաստան-Սփյուռք 6-րդ համահայկական համաժողովի շրջանակում կմարվի և շրջանառության մեջ կդրվի 3 նամականիշ՝ նվիրված «Զինծառայողների ապահովագրության հիմնադրամ» թեմային:
ՀՀ գիտությունների ազգային ակադեմիան և Չինաստանի հասարակական գիտությունների ակադեմիան կստորագրեն գիտական համագործակցության մասին համաձայնագիր: Այն կստորագրեն ՀՀ ԳԱԱ նախագահ ակադեմիկոս Ռադիկ Մարտիրոսյանը և Չինաստանի հասարակական գիտությունների ակադեմիայի նախագահ Վան Վեյգուանը: Համաձայնագիրն ուղղված է լինելու հումանիտար-հասարակական գիտությունների բնագավառում համագործակցության զարգացմանը և ամրապնդմանը:
Մեգերյան ընկերությունը նշում է իր հիմնադրման 100-ամյակը: Միջոցառմանը հրավիրված են ավելի քան 350 անձ, այդ թվում բարձրաստիճան պաշտոնյաներ: Միջոցառման ընթացքում «Հայաստանի մանուկներ» հիմնադրամի նախագահ Գարո Արմենը և Մեգերյան ընկերության սեփականատեր Րաֆֆի Մեգերյանը կկտրեն հոբելյանական գորգը, որը գործվել է «Հայաստանի մանուկներ» հիմնադրամի շահառու Վանանդ համայնքի երիտասարդների կողմից «Մեգերյան կարպետ» ընկերության հմուտ գորգագործների օգնությամբ՝ մի քանի ամսվա ընթացքում։
Եվս մեկ հոբելյանի մասին: Հայ օպերային երգչուհի Արաքս Մանսուրյանը տոնում է իր ստեղծագործական կյանքի 50-ամյակը: Այսօր հրավիրված ասուլիսում Արաքս Մանսուրյանը կխոսի անցած ուղու, ստեղծագործական ձեռբերումների մասին: Ներկա կլինեն աշխարհահռչակ կատարողներ:
Ուրուգվայի «Ռադիո Արաքս»-ն էլ տոնում է իր գործունեության 10-ամյակը: «Ռադիո Արաքս»-ի տնօրեն, լրագրող Դիեգո Կարամանուկյանը կհանդիպի լրագրողների հետ: Նա կանդրադառնա ռադիոյի ձեռբերումներին, ինչպես նաև տեղի հայ համայնքի խնդիրներին:
«Մոսկվա» կինոթատրոնում կկայանա «Ղազախական ֆիլմերի շաբաթ»-ի բացման արարողությունը եւ առաջին ֆիլմի ցուցադրումը: Միջոցառման ընթացքում կցուցադրվեն Ղազախստանի կինոարտադրության տարբեր տարիների լավագույն ֆիլմերը: Շաբաթվա ֆիլմերի ցանկում ընդգրկվել են «Շալ», «Նվեր Ստալինին», «Իմ մանկության երկինք», «Նոմադ» և «Անդրսիբիրյան ճեպընթաց» ֆիլմերը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
