ՀՀ տնտեսական զարգացման և ներդրումների նախարար Սուրեն Կարայանը Մոսկվայում Ֆինանսիստի օրվա առթիվ կայացած «Հեղինակություն» մրցանակաբաշխության շրջանակներում ստացել է մրցանակ «Եվրասիական տնտեսական ինտեգրման գործում ներդրած անձնական ավանդի համար»։ Այս մասին«Արմենպրես»-ին տեղեկացրին ՀՀ տնտեսական զարգացման և ներդրումների նախարարության տեղեկատվության և հասարակայնության հետ կապերի բաժնից:
Կազմակերպիչների կողմից մրցանակը նախարարին տրվել է հետևյալ մեկնաբանությամբ․
«Սուրեն Կարայանը ակտիվ մասնակցություն է ունեցել Հայաստանի՝ Եվրասիական տնտեսական միությանն անդամակցության գործընթացում։
Լինելով ՀՀ ֆինանսների նախարարի տեղակալ՝ Սուրեն Կարայանը համակարգում էր դեպի եվրասիական միասնական ֆինանսական շուկա Հայաստանի ֆինանսական շուկայի ինտեգրման խնդիրների լայն շրջանակ, ինչպես նաև վերահսկում էր բուջետային և հարկային քաղաքականույթան ոլորտում ինտեգրման օրակարգը։
Ներկայում, լինելով ՀՀ տնտեսական զարգացման և ներդրումների նախարարի պաշտոնում, Սուրեն Կարայանի մասնակցությամբ հաջողությամբ իրականացվում են մեր երկրների ինտեգրման զարգացման խնդիրները տնտեսության, արդյունաբերության, ֆինանսական, դրամական, հարկաբյուջետային ոլորտներում»։
