Վրաստանի կրթութեան եւ գիտութեան նախարարութիւնը սկսած է համակարգիչներու բաշխումը Ջաւախքի առաջին դասարանցիներուն: Այս մասին կը հաղորդէ «News.am»-ը՝ վկայակոչելով «Jnews.ge»-ը։
Յուլիս 22-ին, Վրաստանի կրթութեան եւ գիտութեան նախարարութեան ներկայացուցիչները Ջաւախք հասցուցած են առաջին դասարանցիներու համար նախատեսուած նոթպուք–երը:
Ախալքալաքի շրջանին մէջ, 2017-2018-ի ուսումնական տարեշրջանի 614 առաջին դասարանցիներ պիտի ստանան նոր Acer նոթպուք–եր, իսկ Նինոծմինդայի շրջանի մէջ՝ 351 առաջին դասարանցիներ:
«Իմ առաջին համակարգիչը» ծրագիրը, ըստ որուն բոլոր առաջին դասարանցիներուն պիտի բաժնուի համակարգիչներ, սկսած է 2011-ին:
Այս տարի աննշան, սակայն նուազած է Ախալքալաքի շրջանի առաջին դասարանցիներու թիւը՝ նախորդ տարուան հետ համեմատած: Անցեալ տարի առաջին դասարանցիներու թիւը 674 էր:
Բորժոմի շրջանին մէջ այս տարի համակարգիչներ կը ստանան 337 առաջին դասարանցիներ, Ախալցխայի մէջ՝ 596, Ադիգենիի մէջ՝ 194, իսկ Ասպինձայի մէջ՝ 166:
