«Հայաստանի զարգացման նախաձեռնութիւններ» (IDeA) հիմնադրամի «Տաթեւի վերածնունդ» ծրագիրի նախաձեռնութեամբ երրորդ տարին ըլլալով Տաթեւ համայնքին մէջ Տեառնընդառաջի տօնը առանձնայատուկ կերպով նշուած է:
Փետրուար 14-ին, Տաթեւի վանքին մէջ, վանահայր Միքայէլ վարդապետ Գէորգեանի ձեռամբ, կատարուած է աւելի քան 25 նորապսակներու օրհնութեան կարգ, որուն յաջորդած է տօնական հիւրասիրութիւն, երգ ու պար, կը հաղորդէ «Մետիամաքս»-ը:
«Նման նախաձեռնութիւնները կը մտերմացնեն նորաստեղծ ընտանիքները, իսկ Տաթեւի բնակիչները իրենց աւելի ներգրաւուած կը զգան համայնքային կեանքին»,- ըսած է Հայր Միքայէլը: Անոր խօսքով, այսպիսի նախաձեռնութիւնները կը նպաստեն եկեղեցւոյ շուրջ համախմբման, հոգեւոր կեանքի զարթօնքին եւ ազգային աւանդոյթներու պահպանման:
«Տաթեւի վերածնունդ» ծրագիրի ղեկավար Հայկ Թիւթիւնճեան նշած է, որ տօնական ձեռնարկները նպատակ կը հետապնդեն ոչ միայն համախմբելու երիտասարդ զոյգերը, այլեւ տօներու միջոցով Տաթեւի տարածաշրջանի զբօսաշրջային ոչ աշխոյժ շրջանին մէջ նպաստելու համայնքային կեանքի աշխուժացման:
