Ազրպէյճանի հետ զինուած հակամարտութեան վերսկսումը հնարաւոր է:
Ըստ Artsakhpress.am-ի, Lenta.ru-ին տուած հարցազրոյցի մը ընթացքին Հայաստանի պաշտպանութեան նախարար Վիգէն Սարգսեան այս մասին յայտարարած է.
«1994 թուականին եռակողմ ձեւաչափով` Ազրպէյճան, Լեռնային Ղարաբաղ եւ Հայաստան, հրադադարի մասին համաձայնագիր ստորագրուեցաւ: Ցաւօք` 1994 թուականէն ի վեր Պաքուն կը խափանէ խաղաղ գործընթացը: Աւելին, հետեւողականօրէն կը խափանուին հակամարտութեան լուծման հնարաւոր ուղիներ գտնելու` միջազգային հանրութեան բոլոր փորձերը, ի դէմս ԵԱՀԿ Մինսկի խումբի համանախագահներու (Ռուսիա, ԱՄՆ, Ֆրանսա): Այս տարուան Ապրիլին Ազրպէյճանը լայնածաւալ յարձակում ձեռնարկեց Լեռնային Ղարաբաղի դէմ եւ պարտութիւն կրեց: Մենք մեր աշխատանքը կը կառուցենք ռազմական գործողութիւններու վերսկսման հնարաւորութեան կանխավարկածին վրայ:
Միանգամայն ակնյայտ է, որ Հայաստանի եւ տարածաշրջանի երկիրներու համար շահեկան չէ հակամարտութեան հնարաւոր սրումը: Ըլլալով Լեռնային Ղարաբաղի Հանրապետութեան անվտանգութեան երաշխաւորը` Երեւանը ստիպուած պիտի ըլլայ ներգրաւուիլ հակամարտութեան մէջ, եթէ ատիկա տեղի ունենայ: Հասկնալի է նաեւ, որ պատերազմի վերսկսումը լրջագոյն սպառնալիք պիտի ըլլայ ամբողջ Հարաւային Կովկասի համար»,- յայտարարած է նախարարը:
