Նոյեմբեր 28-29 Կրասնոդարի հայոց թեմի առաջնորդարանի «Վարդանեան» կեդրոնին մէջ պիտի կայանայ «Մայրենի լեզուի ուսուցման խնդիրները Ռուսաստանի Դաշնութեան հայ համայնքներում» տարածաշրջանային համաժողովը: Այս մասին կը հաղորդէ ՀՀ Սփիւռքի նախարարութեան մամուլի եւ տեղեկատուութեան գրասենեակը։
Համաժողովի համակազմակերպիչներն են հայաստանեայց առաքելական սուրբ եկեղեցւոյ հարաւային Ռուսիոյ հայոց թեմը, (թեմի առաջնորդ` Գերաշնորհ Տէր Մովսէս Եպիսկոպոս Մովսէսեան), Ռուսաստանի հայերու միութեան Կրասնոդարի երկրամասի տարածաշրջանային բաժանմունքը (նախագահ` Ռազմիկ Գէորգեան):
Համաժողովի բացմանը առընթեր պիտի ցուցադրուի ՀՀ Սփիւռքի նախարար Հրանոյշ Յակոբեանի տեսաողջոյնը:
Համաժողովին պիտի մասնակցին աւելի քան 50 ուսուցիչ, մանկավարժ, դպրոցի եւ կրթական գործի պատասխանատուներ` Կրասնոդարի եւ Ստաւրոպոլի երկրամասերու, Ռոստովի մարզի աւելի քան 2 տասնեակ քաղաքներէ, բնակավայրերէ, Օմսկէն, ինչպէս նաեւ` Մոսկուայի մարզէն, Տոմոտետովոյէն:
Համաժողովին պիտի մասնակցին նաեւ ՀՀ սփիւռքի նախարարի խորհրդական Ստեփան Պետրոսեանը եւ ՀՀ Սփիւռքի նախարարութեան աշխատակազմի համահայկական ծրագիրներու վարչութեան պետ Գագիկ Գեանճումեանը:
Համաժողովին նպատակն է նպաստել տարածաշրջանին մէջ կրթական եւ մշակութային կեանքի զարգացման ու աշխուժացման, հայ երիտասարդութեան մէջ հայոց լեզուի իմացութեան մակարդակի բարձրացման, մեթոտական օժանդակութիւն ցուցաբերել ուսուցիչներուն եւ աջակցիլ կրթական այլ խնդիրներու լուծման:
Համաժողովին ընթացքին զեկոյցները, ելոյթներն ու քննարկումները պիտի ծաւալին հետեւեալ հարցերուն շուրջ.
– Հայկական կրթօճախներուն մէջ հայոց լեզուի եւ գրականութեան ուսուցիչներու կողմէ հայեցի կրթութեան եւ դաստիարակութեան գործին ներդրուած նոր մեթոտները եւ կուտակուած փորձը:
– Ռուսախօս միջավայրի մէջ հայերէնի ուսուցման մեթոտիկայի եւ ուսումնական ձեռնարկներու ստեղծման առանձնայատկութիւնները եւ այն փորձը, որ արդէն կը կիրառուի Ռուսաստանի Դաշնութեան հարաւային եւ այլ տարածաշրջաններու համայնքներու հայկական մէկօրեայ կրթօճախներուն մէջ:
– ՀՀ Սփիւռքի նախարարութեան կրթական ծրագիրներուն մասնակցութեան հարցեր, նոր կրթական ճարտարագիտութիւններ:
