Թուրքիոյ Եոզկաթ նահանգի Սարըքայա շրջանի գիւղերէն մէկուն մէջ գտնուող հայկական եկեղեցւոյ մաքրութեան կը հետեւի տեղւոյն թուրք կրօնաւորներէն Մեթին Հալըճը: Թրքական «Հիւրյիէթ» օրաթերթը կը նշէ, որ մինչեւ 1960-ական թուականներ Սարըքայա շրջանին մէջ տակաւին գոյատեւած են շարք մը հայ ընտանիքներ, որոնք յետագային արտագաղթած են: Անոնց ժառանգորդները տարուայ մէջ քանի մը անգամ կ՛այցելեն Սարըքայայի մէջ գտնուող պատմական հայկական եկեղեցին: Եոզկաթ նահանգին եւ Արեւմտեան Հայաստանի շարք մը շրջաններուն մէջ մեծ տարածում ունի գանձի գողերու խնդիրը, որուն պատճառով տեղւոյն բնակչութեան ձեռքերով կ՛աւերուին եւ կ՛ոչնչացուին հայկական բազմաթիւ եկեղեցիներ ու գերեզմաններ: Մինչդեռ Սարըքայայի իմամ Մեթին Հալըճը, հակառակ այս ամէնուն, որոշած է ոչ միայն չվնասել հայկական եկեղեցին, այլ նաեւ լրջօրէն կը զբաղի անոր պահպանումով՝ շարժելով տեղւոյն բնակչութեան ու թրքական լրատուամիջոցներուն զարմանքը:
Սարըքայա Շրջանի Գիւղերէն Մէկուն Մէջ Գտնուող Հայկական Եկեղեցւոյ Մաքրութեան Կը հետեւի Տեղւոյն Թուրք Կրօնաւորներէն Մեթին Հալըճը
