Հայաստանի Անկախութեան 25-րդ տարեդարձի օրը հայ ցանցահէնները ազրպէյճանական շարք մը կայքէջերու վրայ յարձակում գործած են: Անոնք, ազրպէյճանական որոշ կայքէջերու վրայ զետեղած են Հայաստանի դրօշը պատկերող նկար եւ շնորհաւորական ուղերձ՝ «Տօնդ շնորհաւո՛ր, Հայաստան»:
«Մոնթէ Մելքոնեան» համացանցային բանակի Ֆեյսպուքի էջին վրայ ալ հրապարակուած է յայտարարութիւն մը, ըստ որուն` խումբին կողմէ կատարուած գործողութիւններու ընթացքին ձեռք ձգուած է ազրպէյճանցի 1200 սպաներու անձնական տուեալները, ներառեալ՝ անձնաթուղթեր եւ հեռաձայնի թիւեր, բնակութեան հասցէներ եւ անձնական այլ տուեալներ:
Խումբին մէկ այլ գործողութեամբ ալ ձեռք ձգուած է ազրպէյճանական դրամատուներէն մէկուն յաճախորդներու տուեալներու շտեմարանը, որ կ՚ընդգրկէ շուրջ 10.000 հոգիի անձնական տուեալները:
