Հռոմի կաթոլիկ եկեղեցւոյ սրբազան քահանայապետ Ֆրանչիսկոս պապը Լեռնային Ղարաբաղի հակամարտութեան` դիւանագիտական ճանապարհով կարգաւորման կողմնակից է:
Այս մասին Պաքուի մէջ կայացած մամուլի ասուլիսի ժամանակ ըսած է Վատիկանի ներկայացուցիչ մոնսենեօր Վլատիմիր Ֆեքէթէն:
Ինչպէս կը նշէ «Թրենտ» գործակալութիւնը, անոր խօսքով` Կաթոլիկ եկեղեցին դէմ է պատերազմին ու կոչ կ՛ընէ նմանօրինակ հակամարտութիւնները լուծել խաղաղ ճանապարհով:
Միեւնոյն ժամանակ, Ֆեքէթէն իր խօսքին մէջ ընդգծած է, որ Կաթոլիկ եկեղեցին չի զբաղիր ԼՂ հակամարտութեան խնդրով:
Հոգեւորականը դժուարացած է յստակ պատասխանել այն հարցին, թէ արդեօք այս թեման պիտի քննարկուի՞ Հռոմի պապի` Պաքու կատարելիք այցի ծիրէն ներս:
Աղբիւրը կը յիշեցնէ, որ կաթոլիկներու հովուապետի այցը Ատրպէյճան նախանշուած է Հոկտեմբեր 2-ին:
