Հարաւային Քալիֆորնիոյ համալսարանի հայագիտութեան ուսումնարանը՝ Շարժանկարի արուեստի դպրոցին հետ համատեղ՝ Սեպտեմբեր 1-ին, Լոս Անճելըսի մէջ պիտի կազմակերպէ բեմադրիչ Էրիք Նազարեանի եւ սենարիստ Նարէ Մկրտչեանի «Տան միւս կողմը» ֆիլմը՝ Հայոց Ցեղասպանութեան վերաբերեալ: Այս մասին կը հաղորդէ Armenpress.am-ը։
Ուսումնարանի ղեկավար Սալբի Ղազարեանի խօսքով` ցեղասպանութենէն ետք փրկուած հայերէն շատերը, որոնք մնացած էին Թուրքիոյ մէջ, ձեռք բերած են նոր ինքնութիւն մը, երբեմն իրենց կամքով, իսկ յաճախ` ոչ:
«Անոնք թաքնուած հայեր էին, գիտէին ով են իրենք, սակայն երբ ցեղասպանութեան սերունդը անհետացաւ, երրորդ կամ չորրորդ սերունդները, որոնք աստիճանաբար բացայայտեցին իրենց արմատները, կը ցնցուէին եւ պատրաստ չէին երրորդ ինքնութեան: Այս ֆիլմը այդ անցումային դժուար շրջանին մասին է»,- ըսած է ուսումնարանի ղեկավարը:
«Տան միւս կողմը» փաստագրական ֆիլմը պատմութիւն մըն է հայ բեմադրիչի եւ «թուրք» կնոջ` Ցեղասպանութեան 100-ամեայ տարելիցի նախօրէին տեղի ունեցած ճամբորդութեան մը մասին, դէպի Հայաստան եւ Թուրքիա: Նարէ Մկրտչեանի թրքուհի հերոսուհին, որ համարձակութիւն ունեցած է Ցեղասպանութեան 100-ամեակի տարելիցին նախորդած օրերուն երթալ Երեւան, իր ողջ կեանքը ապրած է իբրեւ թրքուհի, մինչ այն պահը, երբ իմացած է, որ իր մեծ մայրը հայուհի է: Ան թաքցուցած է իր ինքնութիւնը, բայց իր մէջ միշտ կռուած են Ցեղասպանութիւն ապրածն ու Ցեղասպանութիւնը ժխտողը: Ան խոր ապրումներով եւ հակասական յոյզերով կը բարձրանայ Ծիծեռնակաբերդ: Հայկական արմատներով թրքուհիին կը հետեւի հայ բեմադրիչը, որ ծնած է Ցեղասպանութենէն շատ յետոյ՝ Ցեղասպանութիւնը վերապրածներու գերդաստանի մէջ: Ան նոյնպէս ունի իր հակասական զգացումները, պայքարը՝ ինքն իր մէջ:
Էրիք Նազարեան ծնած է Հայաստան, սակայն մեծցած է Լոս Անճելըսի մէջ: Համալսարանի Շարժանկարի արուեստի դպրոցի շրջանաւարտ է: Դասախօսութիւններ կարդացած է Հայոց Ցեղասպանութեան վերաբերեալ Եւրոպայի եւ ԱՄՆ համալսարաններու մէջ: Բեմադրիչ Նարէ Մկրտչեան նոյնպէս կը բնակի Լոս Անճելըս եւ Շարժանկարի արուեստի դպրոցի շրջանաւարտ է: Անոր տարերքն է պատմել մարդկային եզակի պատմութիւններ, որոնք մարդոց կը կապեն իրար` չճանչնալով ազգային, կրօնական եւ այլ սահմաններ:
