Ֆրանսահայ երգիչ Շառլ Ազնաւուր կոչ կ՝ընէ մերօրեայ հերոսներու թեկնածութիւնը ներկայացնել «Աւրորա» մարդասիրական 2017-ի մրցանակին: Այս մասին, ըստ Artsakhpress.am-ի, կը հաղորդուի մրցանակի դիմատետրի էջին միջոցով:
«Աւրորա» մարդասիրական մրցանակի դափնեկիրին կը տրուի 100,000 ԱՄՆ տոլար պարգեւ եւ անոր ոգեշնչած բարեգործական կազմակերպութիւններուն 1,000,000 ԱՄՆ տոլարի դրամաշնորհի ներկայացնելու հնարաւորութիւն:
Նշենք, որ թեկնածուներու յառաջադրումները սկսած են Յունիս 1-ին եւ պիտի շարունակուին մինչեւ Սեպտեմբեր 9:
«Աւրորա» մրցանակը նպատակ ունի ճանաչման արժանացնելու անոնց, որոնք վտանգի կ՝ենթարկեն սեփական կեանքը, առողջութիւնը, ազատութիւնը, որպէսզի փրկեն եւ օգնութիւն ցուցաբերեն այն մարդոց, որոնք կը տառապին մերօրեայ ողբերգութիւններու, յատկապէս` մարդածին աղէտներու եւ մարդկայնութեան դէմ իրականացուող յանցագործութիւններու հետեւանքով:
«Աւրորա»ն հիմնած են 100 LIVES նախաձեռնութեան հիմնադիրները: «Աւրորա» մրցանակը կը շնորհուի Հայոց Ցեղասպանութիւնը վերապրածներու անունով` իբրեւ երախտագիտութիւն զանոնք փրկողներուն: «Աւրորա» համաշխարհային մարդասիրական ամենամեայ երկրորդ մրցանակը պիտի շնորհուի 2017 թուականի Ապրիլ 24-ին, Երեւանի մէջ:
