Թուրքիոյ ազգային կրթութեան նախարարութեան Եւրոմիութեան եւ արտաքին յարաբերութիւններու գլխաւոր վարչութիւնը քայլեր կը ձեռնարկէ, որպէսզի Լեռնային Ղարաբաղի Հանրապետութեան 25-ամեակին առիթով կայանալիք միջազգային խորհրդաժողովին, թրքական կողմէն որեւէ մասնակցութիւն չըլլայ: Այս մասին կը հաղորդէ «Ermenihaber.am»-ը վկայակոչելով թրքական «Ilerihaber.org»-ը։
Նշեալ վարչութիւնը յատուկ գրութեամբ դիմած է Նորարարական եւ կրթական ճարտարագիտութիւններու վարչութեան` պահանջելով, որ հրաւէր ստանալու պարագային որեւէ թրքական պատուիրակութիւն չմասնակցի՝ ՀՀ երիտասարդութեան եւ մարմնամարզի նախարարութեան կողմէ կազմակերպուելիք յոբելինական խորհրդաժողովին, որ տեղի պիտի ունենայ 2016 Սեպտեմբեր 15-18:
Նորարարական եւ կրթական ճարտարագիտութիւններու վարչութիւնն ալ իր հերթին, գրաւոր կերպով հրահանգած է Թուրքիոյ նահանգապետարաններուն եւ նահանգային ազգային կրթական վարչութիւններուն` հայկական կողմէն համապատասխան հրաւէր ստանալու պարագային զերծ մնալու խորհրդաժողովի մասնակցելէ:
