ԼՂՀ նախագահին կից սահմանադրական բարեփոխումներու մասնագիտական յանձնաժողովին կողմէ Յուլիս 30-ին հանրապետութեան նախագահին ներկայացուած սահմանադրական բարեփոխումներու հայեցակարգը բաղկացած է նախաբանէ, մարդու եւ քաղաքացիի հիմնական իրաւունքներն ու ազատութիւնները, կառավարման համակարգը, դատական իշխանութիւնը, տեղական ինքնակառավարումը եւ հանրաքուէ բաժիններէն: Այս մասին կը տեղեկացնեն Արցախի Հանրապետութեան նախագահի աշխատակազմի տեղեկատուութեան գլխաւոր վարչութենէն:
Հաշուի առնելով հանրային հետաքրքրութիւնը ներկայացուած հայեցակարգի, մասնաւորապէս կառավարման համակարգի տարբերակին հանդէպ, կը տեղեկացնենք, որ մասնագիտական յանձնաժողովին կողմէ առաջարկուած է նախագահական կառավարման նախատիպ:
Հայեցակարգը հանրապետութեան նախագահին կողմէ հաւանութեան արժանանալու պարագային մասնագիտական յանձնաժողովը պիտի շարունակէ աշխատանքները` սահմանադրական բարեփոխումներու նախագիծին վրայ:
