Վրէժխնդրութեան վրայ հիմնուած քաղաքականութիւնը վաղ թէ ուշ կը յանգեցնէ՝ երկիրին մէջ լուրջ ցնցումներու եւ աղէտներու:
Այս մասին ըստ «Արցախփրես»-ի «Լենթա.ռու»–ի տուած հարցազրոյցի ընթացքին ըսած է՝ ԼՂՀ նախագահ Բակօ Սահակեան, անդրադառնալով այն հարցումին, թէ կրնա՞յ արդեօք Ազրպէյճանը փոխել ԼՂՀ-ի նկատմամբ իր դիրքորոշումը:
«Կը կարծեմ, որ այստեղ հարցը միայն ղարաբաղա–ազրպէյճանական յարաբերութիւններուն չի վերաբերիր: Վրէժխնդրութեան վրայ հիմնուած քաղաքականութիւնը, վաղ թէ ուշ կը յանգեցնէ լուրջ ցնցումներու եւ աղէտներու երկիրին մէջ, ուր այդ գաղափարները բարձրացած են պետական գաղափարախօսութեան մակարդակի: Այդ պատճառով եթէ Ազրպէյճանը կ՛ուզէ խուսափիլ այսպիսի աղէտէ, ուղղակի պարտաւոր է վերանայիլ իր պետականաշինութեան փիլիսոփայութիւնը», ըսած է ԼՂՀ նախագահը:
Այն հարցումին, թէ ինչը կրնայ արմատապէս փոխել տարածաշրջանին մէջ ուժերու դասաւորուածութիւնը, Բակօ Սահակեան պատասխանած է, որ Հարաւային Կովկասը շատ զգայուն եւ բարդ տարածաշրջան է: «Անոր շրջաններէն մէկուն մէջ լուրջ ցնցումները կամ գոյութիւն ունեցող դասաւորուածութիւնը փոխելու երրորդ երկիրներու փորձերը՝ յղի են յեղափոխութիւններով, ոչ միայն եւ ոչ այնքան տեղական` այլ տարածաշրջանային եւ նոյնիսկ համաշխարհային բնոյթի: Այդ պատճառով ալ այս տարածաշրջանին մէջ խաղաղութեան եւ կայունութեան պահպանումը, մասնաւորաբար հակամարտութեան գօտիի մէջ, միջազգային անվտանգութեան կարեւոր երեւոյթ է: Եւ այն պարագան, որ ԵԱՀԿ Մինսքի խումբի համանախագահները ՄԱԿ-ի Ապահովութեան Խորհուրդի մշտական անդամներ են, անոր վառ ապացոյցն է», նշած է նախագահ Սահակեան:
