23-ամեայ ֆինլանտացի երգչուհի Մարիա-Միլլա Լաթելան, որ մէկ տարուան փոխանակման ծրագիրի ուսանող է Շուէտի Օրեպրօ համալսարանին մէջ, վերջերս համալսարանի կողմէ կազմակերպուած համերգին կատարեց՝ Տիգրան Համասեանի երգացանկէն երգ մը: Այս մասին Շուէտէն «Հայերն Այսօր»-ին տեղեկացուցած է Մարիաննա Տօնոյեան:
Մարիա-Միլլան կը խոստովանի, որ Հայաստանի մասին` որպէս երկիր եւ պետութիւն, շատ քիչ բան իմացած է անցեալին: Թէեւ երգի ընտրութիւնը համերգի կազմակերպիչինն էր, Մարիան հաճոյքով երգած է հայերէն:
«Ես ծանօթ եմ Համասեանի արուեստին, քանի որ ան շատ յայտնի է Սքանտինաւիոյ մէջ, բայց պէտք է ըսեմ, որ հայերէնը հեշտ լեզու չէ, ան բաւական բարդ է: Սկիզբը կը կարծէի, թէ ան պէտք է հնչէ ինչպէս ռուսերէնը, այնուհետեւ բացայայտեցի, որ ան կը հնչէ յունարէնի պէս: Ամէն պարագայի վերջապէս եկայ այն եզրայանգման, որ հայերէնը պարզապէս իւրայատուկ լեզու է»:
Կատարման մասին իր յոյզերով կիսուելու շուրջ Մարիա-Միլլան կ’ըսէ, որ երգը իրեն պարգեւած է խորհրդաւոր զգացողութիւններ: «Սկիզբը ինծի հետաքրքրական էր, թէ ինչի մասին է երգը: Այդ էր պատճառը, որ դիմեցի հայուհիի մը, որ նոյնպէս կը յաճախէ Օրեպրու համալսարանը եւ խնդրեցի անոր թարգմանել բառերը: Բայց նոյնիսկ իմաստը բացայայտելէ յետոյ, ես նոյն առեղծուածային զգացողութիւնը ունէի: Քանի որ լեզուն ինքնին առեղծուածային է. ան կը հնչէ գեղեցիկ, բայց եւ միաժամանակ կոպիտ, որ ես այնքան կը հաւնիմ: Ես շատ կը ցանկայի սորվիլ հայերէն եւ երգել աւելի շատ հայկական երգեր», կ’եզրափակէ Մարիա-Միլլա Լաթելան:
