ԵԱՀԿ Մինսքի խումբի համանախագահները մտադիր են կրկին այցելել տարածաշրջան, սակայն այցելութեան յստակ ժամկէտներ դեռ չեն նախանշուած:
Այս մասին «ՌԻԱ Նովոսթի»ին յայտնած է Մինսքի խումբի ռուս համանախագահ Իկոր Փոփով: «Բնականաբար մենք պիտի երթանք, սակայն դեռ ժամկէտ չկայ, անիկա կը քննարկուի կողմերու հետ, երբ անոնց յարմար ըլլայ` հաշուի առնելով անոնց աշխատանքային ծրագիրը», «Արցախփրես»-ի փոխանցմամբ ըսած է Փոփով:
Ան յայտնած է, որ Յուլիս 11-ին Վիեննայի մէջ տեղի ունեցած է Մինսքի խումբի բոլոր անդամներուն նիստ, որուն մասնակցած են Մինսքի խումբի համանախագահներ Փոփով, Փիեռ Անտրիւ (Ֆրանսա), Ճէյմս Ուորլիք (ԱՄՆ), ինչպէս նաեւ ԵԱՀԿ գործող նախագահի անձնական ներկայացուցիչ Անճէյ Քասփրչիկ:
«Ընդհանուր առմամբ այս հանդիպումը նուիրուած էր համանախագահ երկիրներուն կողմէ գործադրուած վերջին միջնորդական ջանքերուն եւ Ս․ Փեթերզպուրկի գագաթաժողովի արդիւնքներուն տրուած գնահատականներուն: Իմ ֆրանսացի եւ ամերիկացի գործընկերները ներկայացուցած են, թէ ինչ զրոյցներ ունեցած են Ֆրանսայի նախագահ Ֆրանսուա Օլանտն ու ԱՄՆ ԱԳ նախարար Ճոն Քերրին: Մենք նաեւ խօսած ենք այն մասին, թէ ինչպէս պէտք է կառուցել յետագայ միջնորդական աշխատանքը», յայտնած է Փոփով:
