Երեւանի «Թէքէեան» Կեդրոնին մէջ երէկ սկիզբ առաւ Ռամկավար Ազատական Կուսակցութեան 27-րդ Պատգամաւորական ժողովը: Ժողովին իրենց մասնակցութիւնը բերին Պէյրութէն, Երուսաղէմէն, Մեծն Բրիտանիայէն, Արժանթինէն, Միացեալ Նահանգներէն, Գանատայէն, Սուրիայէն, Ֆրանսայէն, Պելճիքայէն, Եգիպտոսէն, Աւստրալիայէն, Յորդանանէն եւ Արցախէն այս առթիւ Երեւան ժամանած իրենց շրջանակները ներկայացնող պատգամաւորներ: Ժողովի բացման ուղերձով հանդէս եկաւ ՌԱԿ Կեդրոնական Վարչութեան ատենապետ ընկ. Մայք Խարապեան: Ժողովին պաշտօնական բացման ներկայ եղաւ ՀՀ Սփիւռքի Նախարար Հրանոյշ Յակոբեան, որ ընթերցեց այս առթիւ ՀՀ նախագահ Սերժ Սարգսեանի յղած ուղերձը:
Աւելի ուշ երեկոյեան Երեւանի «Մարիոթ» պանդոկի «Արարատ» սրահին մէջ տեղի ունեցաւ ընդունելութիւն մը ներկայութեամբ պաշտօնական հիւրերու: Նշենք, որ երկու օրերու վրայ երկարող Պատգամաւորական ժողովի աւարտին պիտի ընտրուի ՌԱԿ-ի նոր Կեդրոնական Վարչութիւն:
