Պուլկարական bTV առաջատար հեռատեսիլի ալիքը լրահաղորդում մը հրապարակած է Արցախի Հանրապետութենէն` պատմելով Ապրիլեան քառօրեայ պատերազմի, ազրպէյճանական զինուժի կողմէ Արցախի խաղաղ բնակավայրերու գնդակոծման եւ մշտական կրակոցներու մէջ ապրող արցախցիներու կեանքի մասին, կը հաղորդէ panorama.am-ը:
Տեսանիւթին սկիզբը լրագրող Տեսիսլաւա Ռիզովան կը նշէ, որ Խորհրդային Միութեան փլուզումէն ետք Արցախը նոյնպէս յայտարարեց իր անկախութիւնը, որուն յաջորդեց Ազրպէյճանի կողմէ սկսած պատերազը: Լրագրողին փոխանցմամբ 1994 թուականի հրադադարէն ետք՝ արցախցիները շուրջ 20 տարիներէ աւելի կ՛ապրին մշտական կրակոցներու տակ:
Տեսանիւթին մէջ կ՛երեւին, թէ ինչպէս Մարտակերտի շրջանի բնակիչները հարկադրուած կը լքեն իրենց բնակավայրերը:
Լրագրողը կ՛այցելէ նաեւ Ստեփանակերտի հիւանդանոց, ուր կը բուժուին Ապրիլեան պատերազմի ժամանակ վիրաւորուած զինուորները: Տեսանիւթին մէջ զինուորները կը պատմեն, թէ ինչպէս խոցած են ազրպէյճանական ռազմական ուղղաթիռը:
«Մենք ունինք անկանխատեսելի հարեւան ու հակառակորդ եւ կը հասկնանք, որ երբ ան զգայ ուժի առաւելութիւն պիտի յարձակի մեր վրայ», լրագրողին հետ զրոյցի ընթացքին կ՛ըսէ Արցախի վարչապետ Արայիկ Յարութիւնեան:
