Հունգարիոյ հայ համայնքը կը պատրաստուի Հայոց Ցեղասպանութեան 101-րդ տարելիցի ոգեկոչման ձեռնարկներուն: Այս մասին կը հաղորդէ Հունգարիոյ Հայ ազգային ինքնավարութեան փոխնախագահ Ալեքս Աւանէսեան։
Ձեռնարկը պիտի կայանայ Պուտափեշտի մէջ տեղադրուած խաչքարին մօտ, ուր հայ համայնքի ներկայացուցիչները ծաղիկներ պիտի խոնարհեն՝ 1915-ին Օսմանեան Թուրքիոյ կողմէ իրականացած Ցեղասպանութեան անմեղ զոհերու յիշատակին: Այնուհետեւ Թուրքիոյ դեսպանատան մօտ պիտի իրականանայ բողոքի ցոյց` Հայոց Ցեղասպանութեան ճանաչման պահանջով:
Հունգարիոյ մէջ թուրքերն ու ազրպէյճանցիները սովորաբար կը փորձեն խանգարել հայկական համայնքի ըրած ձեռնարկները: Սակայն ի հեճուկս թուրքերուն, վերջին շրջանին տեղի հայկական համայնքը նպատակադրած է Հունգարիոյ տարբեր քաղաքներու մէջ խաչքարեր տեղադրել: Արդէն որոշ քաղաքներու մէջ համայնքը յաջողութիւններ արձանագրած է՝ խաչքարը տեղադրելու արտօնութիւն ստանալով տեղի իշխանութիւններէն:
