Հիւսիսային Քալիֆորնիոյ ՀԲԸՄի Երիտասարդ արհեստավարժներ կազմակերպութեան նախաձեռնութեամբ, Օքլընտի քաղաքամէջի սրահի մը մէջ տեղի ունեցած է խնդուքի երեկոյ, որուն հասոյթը պիտի տրամադրուի սուրիահայութեան կարիքները հոգալու ջանքերուն։ Այս մասին կը հաղորդէ ԱՄՆի «Ասպարէզ» օրաթերթը։
Ձեռնակին կամաւոր մասնակցած են Լոս Անճելոսէն կատակաբաններ Մայքըլ Պրենտըն, Պեն Ֆելտմըն, Մերի Պասմաճեան եւ Կրեկ Ասատուրեան։
Ելոյթներ ունեցած են նաեւ՝ Հիւսիսային Քալիֆորնիոյ ՀԲԸՄի Երիտասարդ արհեստավարժներու շուկայական հարցերու վարիչ Ափիկ Զօրեան եւ երգիչ Նազօ Պրաւօ։
Հիւսիսային Քալիֆորնիոյ ՀԲԸՄի Երիտասարդ արհեստավարժները այժմ սկսած են նախապատրաստական աշխատանքներ կատարելու՝ իրենց տարեկան 16րդ ձմեռային հաւաքոյթին, որ տեղի պիտի ունենայ Սան Ֆրանսիսքոյի մէջ Փետրուար 12-14ին եւ որուն հասոյթը նմանապէս պիտի տրամադրուի սուրիահայութեան։ Անոր մասին յաւելեալ տեղեկութեանց համար դիմել norcal@agbuyp.org հասցէին կամ այցելել www.agbusfwintergala.org կայքը։
