Արցախը երբեք Ազրպէյճանին մաս պիտի չըլլայ: Այս մասին յայտարարած է նախագահ Բակօ Սահակեան, Regnum լրատուական գործակալութեան մէջ կայացած մամլոյ ասուլիսի ընթացքին, որ նուիրուած էր Մոսկուայի մէջ Արցախի օրերուն, կը հաղորդէ «Արցախփրես»ը:
«Շարք մը եւրոպական եւ ամերիկեան քաղաքներ ու նահանգներ, որոնց շարքին Լոս Անճելոսը, ինչպէս նաեւ Աւստրալիոյ Նոր Հարաւային Ուէյլզ նահանգը, արդէն ճանչցած են Լեռնային Ղարաբաղի ինքնորոշման իրաւունքը: Ինչ կը վերաբերի պետութիւններու կողմէ ճանչցուելուն, ապա այդ մէկը ժամանակի եւ քրտնաջան աշխատանքի հարց է», նշած է Արցախի նախագահը:
Նախագահ Սահակեանի խօսքով` Լեռնային Ղարաբաղի Հանրապետութեան արտաքին քաղաքականութեան ուղղութիւնը կը կառուցուի ուղղեցուցական եւ պատուասիրական սկզբունքներու վրայ:
«Մենք կը ձգտինք կայուն եւ սերտ յարաբերութիւններ ունենալ բոլոր այն երկրներու հետ, ուր մենք Սփիւռք ունինք», ընդգծած է նախագահը:
Խօսելով սահմանին վրայ տիրող իրավիճակի մասին, նախագահ Սահակեան ընդգծած է, որ ի տարբերութիւն Ազրպէյճանի, ԼՂՀն կը փորձէ ընել ամէն ինչ, որպէսզի նուազի լարուածութիւնը եւ խթանէ միջազգային միջնորդներու ջանքերուն:
