Պելճիքայի արտաքին գործոց նախարար Տիտիէ Ռէյնտըր ֆրանսահայ նշանաւոր երգիչ Շարլ Ազնաւուրին պիտի շնորհէ՝ Թագի շքանշանի ասպետի կոչում (Commandeur de l’Ordre de la Couronne):
Ըստ «Արցախփրես»ի cinetelerevue.be կայքը կը փոխանցէ, որ 91ամեայ երգիչը 17 Նոյեմբերին Պրիւքսելի Forest National սրահին մէջ հանդէս պիտի գայ համերգով: Մրցանակը Ազնաւուրին պիտի յանձնուի համերգի նախօրէին:
Թագի շքանշանը Պելճիքայի արքայական պետական պարգեւն է, որ ստեղծուած է 1897 թուականին:
Նշանաւոր ֆրանսահայ երգիչ, երգահան, դերասան եւ հասարակական գործիչ Շարլ Ազնաւուր ծնած է Փարիզ 22 Մայիս 1924ին: Բազմաթիւ յայտնի գործերու հեղինակ եւ կատարող է: Վաճառուած է Ազնաւուրի ստեղծագործութիւնները ամփոփող շուրջ 100 միլիոն ձայնապնակ: 2009 թուականէն Ազնաւուր Զուիցերիոյ մէջ Հայաստանի դեսպան է, ինչպէս նաեւ Ժնեւի ՄԱԿի գրասենեակի ու այլ միջազգային կազմակերպութիւններու մէջ Հայաստանի մշտական ներկայացուցիչ:
