Հալէպի մէջ երկու օրէ իվեր ելեկտրականութիւնը անջատուած է՝ ելեկտրամատակարարման կեդրոնի վնասուելուն հետեւանքով։ Ջուրը եւս անհասանելի է երկու օրէ ի վեր։ Հալէպը արտաքին աշխարհին կապող միակ ճանապարհը՝ Խանասէրը ցարդ կը մնայ փակուած, որուն հետեւանքով վառելանիւթ եւ սննդամթերք չի հասնիր քաղաք: Հալէպ մտնելն ու քաղաքէն դուրս գալը անհնար է, «Եռագոյն»ին կը յայտնէ «Գանձասար»ի խմբագիր Զարմիկ Պողիկեան:
Սննդամթերքի սակագիները աստիճանաբար կը բարձրանան, վառելանիւթի տագնապին հետեւանքով ելեկտրականութիւն հայթայթող գործիքները (ամբերները) աւելի նուազ ժամերով ելեկտրականութիւն կը տրամադրեն բնակչութեան։ Սուրիական բանակը կ՛աշխատի ականազերծել ճանապարհը ու ետ մղել զինեալ խմբաւորումները, որոնք օրեր առաջ թափանցած էին Խանասէրի կարգ մը շրջաններն ու ականապատած ճանապարհը։
