Զուլում եւ Մուշեղ Գրիգորեաններու արուեստանոց-ցուցասրահին մէջ, պիտի բացուի գեղանկարիչներ Զուլում եւ Մուշեղ Գրիգորեաններու աշխատանքներու բարեգործական ցուցահանդէս-վաճառքը:
Ցուցահանդէսի խորագիրն է «Կամուրջ»: Ցուցահանդէս-վաճառքի ամբողջ հասոյթը պիտի տրամադրուի Հայկական Բարեգործական Ընդհանուր Միութեան սուրիահայութեան օգնութեան ծրագիրներուն, Panorama.am-ի հետ զրոյցի ընթացքին տեղեկացուցած է Մուշեղ Գրիգորեան:
«Ես առաջարկեցի Հայկական Բարեգործական Ընդհանուր Միութեանը նման ծրագրով հանդէս գալ: Իրենք էլ ջերմ արձագանգեցին եւ մենք կազմակերպեցինք այս ցուցահանդէսը», ըսած է ան:
Ըստ նկարիչին ցուցահանդէսի խորագիրը երկու խորհուրդ ունի. «Կամուրջ իմ եւ հօրս` Զուլում Գրիգորեանի միջեւ, քանի որ մեր երկուսի գործերն են ցուցադրուելու, եւ կամուրջ Հայաստանի ու Սփիւռքի միջեւ»:
Ցուցահանդէս-վաճառքին ներկայացուած են մօտ 60 աշխատանքներ: Նկարներուն արժէքը 500էն մինչեւ 1500 տոլար է:
Պատասխանելով այն հարցումին, թէ Հայաստանի մէջ արուեստի գործեր գնողները շա՞տ են, Մ. Գրիգորեան պատասխանած է. «Հասարակութեան շրջանում արուեստի նկատմամբ որոշակի վերաբերմունք եւ հետաքրքրութիւն կայ, որ համապատասխանում է մեր երկրի եւ հասարակութեան ընդհանուր վիճակին»:
Ցուցահանդէսը պիտի շարունակուի մինչեւ 26 Հոկտեմբեր:
ՀՀ ժողովրդական նկարիչ Զուլում Գրիգորեան ծնած է 1932 թուականին: 1957ին աւարտած է Երեւանի Պետական գեղարուեստա-թատերական հիմնարկը: 1957էն Հայաստանի նկարիչներու միութեան անդամ է: Զուլում Գրիգորեան կ՛աշխատի համադրական եւ բնանկարի ժանրերու մէջ: Անհատական ցուցահանդէսներ ունեցած է Հունգարիոյ (1972), Չեխոսլովաքիոյ (1972), Գերմանիոյ (1977), ԱՄՆի (1977), Դանիոյ (1978), Ֆրանսայի (1977, 1978), Մոսկուայի (1987), Երեւանի (1994, 1998) եւ Վիեննայի մէջ (2002):
Մուշեղ Գրիգորեան ծնած է Երեւան 1960 թուականին: 1985էն կը մասնակցի Հանրապետական եւ միջազգային ցուցահանդէսներու: 1988էն Հայաստանի Նկարիչներու միութեան անդամ է: Զուցահանդէսներ ունեցած է 1987ին Մոսկուա, 1987ին Աֆղանիստան, 1990ին Զուիցերիա, 1992ին Սուրիա, 2001ին EuroArt Պարսելոնա, 2002ին Թոքիօ Արուեստի փառատօն եւ 2002ին Պարսելոնա Int Art Promotion: Անհատական ցուցահանդէսներ ունեցած է 1994ին եւ 1998ին Երեւան, 2003ին Վիեննա, 2004ին Փարիզ Cité des Arts , 2008ին Երեւան:
