Ազրպէյճանը կը շարունակէ մերժել Լեռնային Ղարաբաղի հակամարտութեան խաղաղ կարգաւորման ուղղուած՝ ԵԱՀԿ Մինսքի խումբի համանախագահներու առաջարկները եւ պարբերաբար կը խախտէ հրադադարի պայմանագիրը, որ կը յանգեցնէ զոհերու` նաեւ խաղաղ բնակչութեան մէջ:
Այս մասին ըստ Armenpress.am-ի, ՄԳԻՄՕ-ի՝ Միջազգային յարաբերութիւններու Մոսկուայի պետական ուսումնարանի 3րդ միջազգային ֆորումի ժամանակ, իր ելոյթին մէջ ըսած է ՀՀ նախագահ Սերժ Սարգսեան:
«Բոլորովին վերջերս Ազրպէյճանը կոպտօրէն խախտում էր հրադադարը հայ-ազրպէյճանական սահմանին եւ ղարաբաղա-ազրպէյճանական շփման գծում` օգտագործելով ծանր զինատեսակներ: Ազրպէյճանը շարունակում է խախտել միջազգային իրաւունքի բոլոր նորմերը եւ ստանձնած պարտաւորութիւնները հակամարտութեան կարգաւորմանը հասնելու ճանապարհին», նշած է նախագահ Սարգսեան:
ՀՀ նախագահը նշած է, որ Ազրպէյճանը իր ապակառուցողական քայլերը արդարացնելու համար, պարբերաբար յղում կը կատարէ հակամարտութեան կարգաւորման ՄԱԿի անվտանգութեան 4 բանաձեւերուն, սակայն առաջինը ինք կը խախտէ այդ բանաձեւերը: «Այդ 4 բանաձեւերից ամենակարեւորը ռազմական գործողութիւնների անյապաղ դադարեցումն է, Մինսքի խմբի շրջանակներում հակամարտութեան խաղաղ կարգաւորումն է, իսկ Ազրպէյճանը ցոյց է տուել, որ ընդունակ չէ դրան: Հետեւաբար հենց Ազրպէյճանն է խախտում այդ բանաձեւերը», ընդգծած է նախագահը:
Եզրափակելով ելոյթը ՀՀ նախագահը վերահաստատած է Հայաստանի պատրաստակամութիւնը՝ Լեռնային Ղարաբաղի հակամարտութեան խաղաղ կարգաւորման հասնելու հարցով:
