Աւստրալահայ աւելի քան տասը նկարիչներու 100 գեղանկարային ու լուսանկարային աշխատանքներ մէկ յարկի տակ։ Երեւանի ժամանակակից արուեստի թանգարանին մէջ 25 Սեպտեմբերին բացումը կատարուեցաւ «Հայկական կեանքեր, աւստրալական երազներ» խորագիրով ցուցահանդէսին: Այս մասին կը հաղորդէ Panorama.am-ը։
Թանգարանի տնօրէն Նունէ Աւետիսեան յայտնեց, որ աւստրալահայ նկարիչներու համար հայաստանեան այս ցուցահանդէսը առաջինն է. «Այս ցուցահանդէսը կարեւոր է այն առումով, որ Հայաստանում առաջին անգամ է, որ աւստրալահայ փրոֆէսիոնալ նկարիչները եւ լուսանկարիչները հանդէս են գալիս ցուցահանդէսով: Նկարիչները հնարաւորութիւն կ’ունենան ցոյց տալ հայ հանդիսատեսին Աւստրալիայի հեռանկարներն այնպէս՝ ինչպէս ներկայացնում են հայկական ժառանգութիւնը Աւստրալիայում»:
Ն. Աւետիսեանի խօսքով, դեռ մէկ տարի առաջ որոշած են այսպիսի ցուցահանդէս կազմակերպել Երեւանի մէջ. «Մէկ տարի առաջ ծանօթացել ենք համայնքի ներկայացուցչի հետ եւ որոշել ենք, եթէ ստացուի, անպայման ցուցահանդէս կազմակերպել: Նա վերադարձել է Աւստրալիա, խօսել նկարիչների հետ, ովքեր մեծ պատրաստակամութիւն են յայտնել ոչ միայն ուղարկել իրենց աշխատանքները, այլ նաեւ գալ Հայաստան ու անձամբ ներկայ լինել»:
Մասնակիցներն են Լուսի Սարգիսեան, Արա Նալպանտեան, Կիրօ Դաւիթեան, Ռոպերթ Սրճարարեան, Հենրիկ Միքայէլեան, Պետրոս Հովակիմեան, Շաքէ Վարդանեան, Շաքէ Պէրպէրեան, Յակոբ Մաճարեան, Փոլեթ Արզումանեան, Հելեն Ալաճաճեան, Էտտի Վեցմատեան:
Ցուցահանդէսը պիտի տեւէ մինչեւ 2 Հոկտեմբեր:
