Մուսա լերան հերոսամարտի պատմութեան եւ մուսալեռցիներու ազգագրութեան թանգարանը կը պատրաստուի Մուսա լերան հերոսամարտի 100-ամեակին, կ’ընթանան բարեկարգման աշխատանքներ եւ նոր ցուցադրութեան կազմակերպում:
Panorama.am-ի փոխանցմամբ թանգարանի տնօրէն Դաւիթ Սարգսեան ըսած է, որ բաւական յաւակնոտ ծրագիր ունին, կը ցանկան ինքնատիպ ձեւով ներկայացնել ցուցադրութիւնը:
«Թէ որքանով կը յաջողուի, կը հասցնենք այդ ծրագիրն ամբողջութեամբ իրականութիւն դարձնենք, դա է խնդիրը», նշած է ան:
Մուսա լերան հերոսամարտի 100-ամեակը կը լրանայ Սեպտեմբերին: Սեպտեմբեր 19-20ին յուշահամալիրի տարածքին մէջ նախատեսուած են շարք մը ձեռնարկներ, որոնք պիտի կազմակերպուին ինչպէս «Մուսա լեռ Հայրենակցական բարեգործական հասարակական կազմակերպութեան», այնպէս ալ պետական յանձնաժողովին կողմէ:
Դ. Սարգսեան տեղեկացուցած է, որ Սեպտեմբեր 19-ին ժամը 17:00-ին պիտի սկսի աւանդական հարիսայի պատրաստման արարողութիւնը: Սեպտեմբեր 20-ի առաւօտեան Երեւանի Շահումեանի արձանի մօտէն պիտի մեկնարկէ քայլարշաւ՝ 40 հոգի ոտքով պիտի երթան Մուսա լերան հերոսամարտի յուշահամալիր, ժամը 10:00-ին պիտի մատուցուի պատարագ, պիտի կատարուի հոգեհանգստեան արարողութիւն, ժամը 11:30-ին պիտի մեկնարկէ հերոսամարտի 100-ամեակին նուիրուած հանդիսաւոր արարողութիւն, նաեւ հարսիայի օրհնում, բաշխում, հիւրասիրութիւն:
Նշենք, որ կառավարութեան որոշմամբ 35 միլիոն դրամ տրամադրուած է ՀՀ պաշտպանութեան նախարարութեան, Արմաւիրի մարզի Բաղրամեանի գիւղական համայնքի վարչական սահմաններուն մէջ գտնուող՝ Մուսա լերան հերոսամարտի յուշահամալիրի հիմնանորոգման եւ բարեկարգման աշխատանքները իրականացնելու նպատակով:
