Պէյրութի «Հայկազեան» համալսարանը Հոկտեմբեր 3-ին Լոս Անճելըսի մէջ պիտի տօնէ իր 60-ամեայ յոբելեանը, որուն ընթացքին տեղի պիտի ունենայ դրամահաւաք, ինչպէս նաեւ ելոյթ պիտի ունենայ աշխարհահռչակ թենոր եւ դիրիժոր Փլասիտօ Տոմինկօն: Ձեռնարկը տեղի պիտի ունենայ «Dorothy Chandler Pavilion» դահլիճին մէջ, որ Լոս Անճելըսի օփերայի տունը կը համարուի: Այս մասին կը հաղորդէ News.am-ը:
Յառաջիկայ տօնակատարութեան մասին հարցումին Փլասիտօ Տոմինկօ ջերմ խօսքերով արձագանգած է: «Մայրս, որ հրաշալի երգչուհի էր, վոքալը ուսանած է հայ մանկավարժի մը մօտ, այդ պատճառով ես ամբողջ կեանքիս ընթացքին հիացած եմ հայ համայնքի երաժշտական աւանդոյթներով եւ կատարողական արուեստով: Հպարտ եմ ձեզի Լոս Անճելըսի օփերայէն ողջունելու համար եւ անհամբերութեամբ կը սպասեմ ձեզի հետ միասին հրաշալի տօն անցնելուն»,- ըսած է ան:
Ձեռնարկին պատուաւոր կոմիտէի անդամներն են Քալիֆորնիոյ նախկին նահանգապետ Ճորճ Տոքմէճեանը, պարոնուհի Քերոլայն Քօքսը, Վարդան Գրիգորեանը ու Ճոյս Փիլիպոսեան-Շթայնը:
Աւելցնենք, որ թէեւ «Հայկազեան» համալսարանը կը գտնուի Լիբանանի մայրաքաղաք Պէյրութի մէջ, ուսումնական այս հաստատութեան ազդեցութիւնը կը զգայ ամբողջ աշխարհի հայութիւնը: Համալսարանը կը պահպանէ հայկական մշակոյթը եւ գրեթէ 60 տարիէ մանկավարժներ կը պատրաստէ Սփիւռքի մէջ:
