ՆՈՐԱՅՐ ՅՈՎՍԷՓԵԱՆ

«Զարթօնք»ի Արցախի Աշխատակից

Երեւանն Ու Ստեփանակերտը Արտաքին Քաղաքականութեան Հարցերուն Մէջ «Կը Ճշդեն Ժամացոյցները»

Սեպտեմբեր 17-ին աշխատանքային այցով Արցախ ժամանած ՀՀ արտաքին գործոց նախարար Զօհրապ Մնացականեանը շարք մը հանդիպումներ ունեցած է: Արցախի նախագահ Բակօ Սահակեանի եւ Զօհրապ Մնացականեանի հանդիպումին քննարկուած են արտաքին քաղաքականութեան եւ այդ ոլորտին մէջ հայկական երկու պետութիւններու փոխգործակցութեան վերաբերող շարք մը հարցեր: Քննարկումներու օրակարգի առաջին կէտին մէջ ազրպէյճանա-ղարաբաղեան հակամարտութեան թեման է: Զօհրապ Մնացականեանը կը կրկնէ այն ինչ աւելի կանուխ Հայաստանի կառավարութեան ղեկավարը յայտարարած էր՝ Արցախի հարցին մէջ որոշիչը պէտք է ըլլայ արցախցիներու ձայնը: «Արցախի՝ Լեռնային Ղարաբաղի հիմնախնդիրի կարգաւորումը կը վերաբերի առաջին հերթին Լեռնային Ղարաբաղին, եւ վերջնական որոշումն ու որոշիչ ձայնը այս հարցին մէջ կը պատկանի Արցախին: Եւ առանց խորհրդակցելու, առանց միասին աշխատելու՝ մենք չենք կրնար որեւէ լուրջ յառաջընթաց գրանցել»,- ընդգծած է ՀՀ արտաքին գործոց նախարարը:

         Նոյն թեմային շուրջ քննարկումներ ծաւալուած է նաեւ Արցախի խորհրդարանին մէջ՝ Աշոտ Ղուլեանի եւ Զօհրապ Մնացականեանի մասնակցութեամբ: Զօհրապ Մնացականեանը նշած է, որ  Արցախի հարցին գծով այժմ կարեւորագոյն խնդիրը անվտանգութեան եւ կարգավիճակի ապահովումն է: «Լեռնային Ղարաբաղը հակամարտութիւն չէ, Լեռնային Ղարաբաղը մարդիկ են,- նշած է Զօհրապ Մնացականեանը:- Արցախցիները, մարդիկ, ստոյգ՝ 150 հազար, իրենց անուններով, առօրեայով, ընտանիքներով, հոգերով, յոյսերով, նպատակներով, ինչպէս իւրաքանչիւր ժողովուրդ, կը կերտեն իրենց ապագան եւ կեանքը: Կը ցանկամ աւելի ընդգծել այն հանգամանքը, որ երբ կը խօսինք Արցախի անվտանգութեան եւ կարգավիճակի մասին որպէս մեզի համար գերակայ խնդիրներ, նկատի ունինք մարդոց»: Արցախի խորհրդարանի նախագահ Աշոտ Ղուլեանը խնդիրին անվտանգութեան տեսակէտէն անդրադարձած է. Ազրպէյճանը կը մեծցնէ հայութեան հանդէպ զաւթողականութեան աշխարհագրութիւնը, եւ թիրախին արդէն միայն Արցախը չէ: «Որեւէ նախադրեալ չ’երաշխաւորեր, որ Ազրպէյճանը տրամադրուած է խաղաղ կարգաւորումի: Առաւօտեան տեղեկութիւն ստացանք, որ Նախիջեւանի կողմէն ալ գնդակոծուած է Հայաստանի տարածքը»,- իր մօտեցումները օրուան փաստերով հիմնաւորած Աշոտ Ղուլեանը:

Հայաստանի արտաքին գործոց նախարարը անդրադարձած է նաեւ Ազրպէյճանի մէջ տեղի ունենալիք լայնամաշտաբ զօրավարժութիւններուն, որուն սցենարով ՀՀ-ը կը հռչակուի հակառակորդ, Արցախի վրայ յարձակումը՝ գործողութիւններու ծրագիր: Զօհրապ Մնացականեան կ’ընդգծէ՝ Երեւանը կողմնակից է բացառապէս խաղաղ կարգաւորման եւ հաւատարիմ է ԵԱՀԿ ՄԽ շրջանակներուն մէջ խաղաղ կարգաւորման իր յանձնառութիւններուն: Բայց անոնք կրնան արդիւնաւէտ ըլլալ, եթէ բոլոր կողմերը այդ յանձնառութիւններուն հաւատարիմ մնան: «Այն ինչ կատարուած է այս շրջանին, որեւէ կերպ չի նպաստեր նման միջավայրի ձեւաւորման՝ թէ՛ հռետորաբանութեան առումով, թէ գործողութիւններու առումով,- շեշտած է Մնացականեանը:- Սա դատապարտելի է եւ անընդունելի, երբ մենք ունինք լարուածութեան նշաններ, ունինք խաղաղ բնակիչները թիրախաւորելու գործողութիւններ»:

         Միջգերատեսչական կապերուն վերաբերող հարցերը Արցախի արտաքին գործոց նախարարութեան մէջ քննարկուած են: Հայաստանի եւ Արցախի արտաքին քաղաքական գերատեսչութիւններու ղեկավարները միտքեր փոխանակած են ԵԱՀԿ Մինսքի խումբի համանախագահութեան ձեւաչափին մէջ հիմնախնդիրին խաղաղ կարգաւորման առնչուող շարք մը հարցերու շուրջ: Մասիս Մայիլեանը Զօհրապ Մնացականեանին յանձնած է Արցախի արտաքին գործոց նախարարութեան 25-ամեակին նուիրուած յուշամետալը:

Հայկական Երկու Հանրապետութիւնները Կը Ճշդեն Տարբեր Իրավիճակներու Ատեն Իւրաքանչիւրի Ընելիքները

Սեպտեմբեր 18-ին աշխատանքային այցով Արցախ ժամանած է ՀՀ վարչապետը՝ բարձրաստիճան զինուորականներու ուղեկցութեամբ: ՀՀ վարչապետը եւ Արցախի նախագահը հանդիպած են Գետաւանի մէջ: ՀՀ բարձրաստիճան պաշտօնեաները Արցախ ժամանած են նորակառոյց Վարդենիս-Մարտակերտ ճանապարհով: Նախագահ Բակօ Սահակեանն ու վարչապետ Նիկոլ Փաշինեանը կարճատեւ զրոյցէ ետք զինուորականներուն մօտ շտապած են: Նիկոլ Փաշինեան կ’ընդգծէ այցի օրակարգի յատկապէս ռազմական բաղադրիչը: «Առաջին նպատակն իրավիճակին տեղում ծանօթանալն է, զինուորների ծառայութեան պայմաններին ծանօթանալը, օպերատիւ վիճակի մասին պատկերացում կազմելը»,- լրատուամիջոցներու ներկայացուցիչներուն հետ զրոյցի ժամանակ նշած է ՀՀ վարչապետը:

Շարունակուող բարեփոխումներուն շնորհիւ՝ առաջնագիծին վրայ փոփոխութիւնները ակներեւ են: Սարքային համալրումը թոյլ կու տայ հակառակորդը դիտարկելու, անհրաժեշտութեան պարագային ալ կանխարգիլիչ հարուած հասցնելու: Հայաստանի եւ Արցախի պաշտպանութեան նախարարներու եւ զինուած ուժերու գլխաւոր հրամանատարակազմի պետի ուղեկցութեամբ՝ նախագահ Սահակեանն ու վարչապետ Փաշինեան հետեւած են զօրամիաւորումի յատուկ նշանակութեան մէկ դասակի ցուցադրական պարապմունքին: «Մեր տղաները լուրջ պատրաստուած են: Պատրաստ են ոչ միայն նմանատիպ տեղանքի, այլեւ աւելի բարդ, բարձր լեռնային պայմաններու մէջ իրականացնելու այդ գործողութիւնները»,- կը վստահեցնէ միաւորումի հրամանատար գնդապետ Կարէն Շաքարեանը:

Ճանապարհը դէպի ամենաբարձրադիր դիրքերը կը տանի: Նոյն ինքն այդտեղ կը շտապեն Արցախի նախագահն ու ՀՀ վարչապետը: Ծովի մակարդակէն աւելի քան երեք հազար մեթր բարձրութեան վրայ մարտական հերթապահութիւն կ’իրականացնեն դիրքապահները: Չեն դժգոհիր: «Ծառայութիւնը կը տարուի դժուարին պայմաններու մէջ: Բայց քանի որ մեր անձնակազմը վարժ է ատոր, կը յաղթահարէ եւ կը կարողանայ ծառայութիւնը բնական տանիլ»,- կը նշէ գումարտակի հրամանատար Արարատ Քեխեանը:

Նախագահ Սահակեանն ու վարչապետ Փաշինեան պաշտպանութեան նախարարներուն մասնակցութեամբ անգամ մը եւս յստակացուցած են հայկական զինուած ուժերու ընելիքները տարբերու իրավիճակներու ատեն: Այցը առիթ էր նաեւ դիրքապահներու ընկերա-կենցաղային պայմաններուն ծանօթանալու, մարտական հերթափոխի տղաներուն հետ շփուելու համար: Նիկոլ Փաշինեանը չի թաքցներ, որ դիրքապահներուն հետ յաճախակի կը հանդիպի, բայց ամէն անգամ ալ տպաւորութիւնները անմոռանալի կ’ըլլան: «Մենք հոգով-սրտով մնում ենք իրենց հետ: Գալուց առաջ էլ էինք իրենց հետ, հեռանալուց յետոյ էլ իրենց հետ կը լինենք: Էնպէս որ՝ պէտք է դուխով լինենք, որ մեր զոյգ պետութիւնների եւ ողջ ժողովրդի առաջ դրուած խնդիրները լուծենք»,- ընդգծած է Հայաստանի Հանրապետութեան վարչապետը:

Ստեփանակերտ

ԱՐՄԵՆԱԿ ԵՂԻԱՅԵԱՆ

Այս երկու բայերը մնայուն շփոթի առարկայ են արեւմտահայուն համար, որ ընդհանրապէս չի զանազաներ ասոնց տարբերութիւնը:

        Ասոնցմէ առաջինը՝ հագնիլ, կը  համապատասխանէ գրաբարի ագանել բային, ֆրանսերէնի՝ porter, անգլերէնի to wear բայերուն: Սոսկածանցաւոր  բայ է եւ  ունի ածանցական խոնարհում՝ հագայ-հագար-հագաւ-հագի՛ր: Ներգործական  է եւ առ այդ օժտուած է ներգործականութեան երկու հիմնական յատկութիւններով.  ա) կրնայ ուղիղ խնդիր ստանալ՝ հագուստ հագնիլ, տաբատ հագնիլ, կօշիկ հագնիլ եւ այլն. բ) նաեւ ունի իր կրաւորականը՝  հագնուիլ.  «Այս կօշիկը դեռ կը հագնուի,  այդ մէկը այլեւս չի հագնուիր»: Ոմանք կ’ըսեն՝ չի հագցուիր, ինչ որ սխալ է. չի հագնուիր-ը կը համապատասխանէ չի տեսնուիր, չի գտնուիր, չի զարնուիր ձեւերուն, որոնք անվիճելի են եւ փոխարինելի չեն տեսցուիր, գտցուիր, զարցուիր  «տարբերակներով»:

          Բայս օժտուած է նաեւ անցողական կամ պատճառական սեռով՝  հագցնել, որ կու տայ  հագցուցի-հագցո՛ւր. օրինակ՝ «Մայրը զաւակին կօշիկը հագցուց»:

         Գալով հագուիլ-ին, ապա այս բայը բոլորովին աշխարհաբարեան ծագում ունի, կը համապատասխանէ ֆրանսերէնի` s’habiller, անգլերէնի to get dressed  բայերուն. սեռով չէզոք է (Տե՛ս Այտընեան,   Քնն. քեր., էջ 65, § 215), հետեւաբար չի կրնար ուղիղ խնդիր ստանալ, եւ ճիշդ այս կէտին մէջ է, որ ընդհանրապէս կը գործուին սխալները: Կարելի չէ ըսել՝  հագուստ կը հագուիմ, կօշիկ կը հագուիմ կամ թէ որեւէ այլ առարկայ յիշել իբրեւ ուղիղ խնդիր: Հագուիլ  կը նշանակէ իր վրայ կրել օրուան կամ եղանակին թելադրած  զգեստները՝ կօշիկէն մինչեւ գլխարկ ի պահանջել հարկին.  այս առումով՝ ան մօտաւոր հոմանիշ է զգեստաւորուիլ կրաւորական բային, որ նմանապէս ուղիղ խնդիր չի կրնար առնել. Ի՞նչ կ’ընես,— կը հագուիմ: Հագուեցայ ու ներկայացումի գացի: Տակաւին չեմ հագուած: Ինչպէս նկատելի է, որեւէ առարկայի անուն՝  իբրեւ ուղիղ խնդիրի, չտրուեցաւ: Վերջին նախադասութիւնը չի նշանակեր, թէ ենթական մերկ է, այլ տուեալ պահի թելադրած պատշաճ իրերը չի կրեր իր վրան: Բայիս խոնարհումը կու տայ՝ հագուեցայ-հագուեցար-հացուեցաւ- հագուի՛ր:  Բայս ունի  պատճառական սեռն ալ՝ հագուեցնել, որ կու տայ հագուեցուցի-հագուեցո՛ւր. օրինակ՝ «Մայրը հագուեցուց  փոքրիկները»,_ կը համապատասխանէ զգեստաւորել հոմանիշին, ինչպէս նաեւ ֆրանսերէն habiller  կամ vêtir, իսկ անգլերէն  to get dressed բայերուն:

         Ծանօթ.– 1. Ամէն պատճառական բայ կրնայ ստանալ ուղիղ խնդիր մը, որմէ զուրկ է  այդ նոյն բային չէզոքը, այս պարագային՝ հագուիլ-ը: Սակայն, ինչ կը վերաբերի հագուեցնել-ին, չենք կրնար ասոր իբրեւ ուղիղ խնդիր տալ  զգեստի մը անունը. ճիշդ ինչպէս որ չենք կրնար ըսել հագուստ հագուիլ, այնպէս ալ չենք կրնար ըսել՝ հագուստ հագուեցնել, տաբատ հագուեցնել եւ նմանները. այլ այդ ուղիղ խնդիրը պէտք է ըլլայ զգեստը կրողի՛ն անունը, այլ խօսքով՝ հագուիլ բայի ենթակա՛ն,  այսպէս՝ հագուեցնել  զաւակը, հիւանդը, Թորոսը, Մարկոսը եւ այլն (օրինակ՝ Տղաս հագուեցաւ եւ  Տղաս հագուեցուցի) համազօր է զգեստաւորեցի-ին: 2. Հագուիլ բայը այլապէս կրնայ ունենալ իր լրացումները՝  շատ հագուիլ, քիչ հագուիլ, վայելուչ հագուիլ, անճաշակ հագուիլ, հաստ հագուիլ, բարակ հագուիլ, արագ հագուիլ,  դանդաղ հագուիլ եւ այլն, որոնք բոլորն ալ պարագայական լրացումներ են:

        Պէտք է լաւ  ի մտի ունենալ, որ հագուիլ-ը, հակառակ իր ուիլ վերջաւորութեան, կրաւորական բայ մը չէ, այլ չէզոք է. այսպիսիները հազուագիւտ են հայերէնի մէջ եւ կը կոչուին կրաւորակերպ, այսինքն՝ կերպով, երեւոյթով կրաւորականի կը նմանին, սակայն ըստ էութեան կրաւորական չեն: Կրաւորական բային հիմնական յատկանիշը ներգործող խնդիր ունենալն է, իսկ հագուիլ-ը չի կրնար ներգործող խնդիր ունենալ: Տեսականօրէն կրաւորական կրնայ ունենալ հագուեցնել   բայը, որ  է հագուեցուիլ, որը սակայն շատ ապաշնորհ ու խժալուր բառ մըն է, որ փաստօրէն չի գործածուիր:       

         «Առձեռն»-ը  չունի հագուիլ:  Քիչ անց  1886-ին  Սամուէլ վ. Գանթարճեան իր  «Գաղղիերէն-հայերէն-տաճկերէն բառարան»-ին  s’habiller բառին կից գրած է հագուիլ, մինչ porter-ին կից՝ կրել, իսկ se porter-ին կից՝ հագնուիլ: Ուրեմն կատարելապէս ըմբռնուած է  հագուիլ-ին եւ հագնուիլ-ին տարբերութիւնը:   Քիչ մը զարմանալի է, բայց ահա Յովհ.  Գազանճեան ետքայլ մը ընելով  հագուիլ-ը կը ներկայացնէ իբրեւ հագնիլ-ին կրաւորականը:

        Աշխարհաբարի բառարաններէն միայն Գայայեան  ունի թէ՛ հագնիլ, թէ՛ հագուիլ. այս վերջինին համար տրուած հոմանիշները՝ շքուիլ, յարդարուիլ,  մոլորեցուցիչ  են: Շուքի ու յարդարանքի գաղափարը չկայ այս բային մէջ. ծովազգեստ մը վրան եւ գլխարկ մը գլուխը անցընելն ալ հագուիլ է, արքայական ծիրանի կրելն ալ հագուիլ է:

         Հայր Պետրոս Ճիզմեճեան ունի միայն հագնիլ, որ սակայն  խոնարհած է հագուեցայ  ձեւով, ինչ որ սխալ է. հագնիլ-ը,  տեսանք, կու տայ հագայ-հագի՛ր,. իսկ հագուեցայ-ն կատարեալն է հագուիլ-ին, որ բացակայ է բառարանէն:

         Տէր Խաչատուրեան եւ հայր Կռանեան չունին հագուիլ:

*      *

*

        Բաղդատական տախտակ արեւելահայերէնի ու արեւմտահայերէնի

        ա) Մերիններուն դիմաց արեւելահայերէնը ունի  հագնել, որ կը համապատասխանէ արեւմտահայերէնի հագնիլ-ին. երկուքն ալ ներգործական են եւ կատարեալի մէջ ունին նոյն խոնարհումը՝ հագայ-հագար-հագաւ-հագի՛ր. օրինակ՝

        —Այսօր նոր զգեստդ հագի՛ր:

        —Նրանց կանայք մուշտակ կը հագնեն:

        —Հագաւ Դաւիթ զէնք ու զրահ:

        —Սեւ ու փայլփլուն կօշիկներ հագան:

        Ասոնք լրիւ կը համապատասխանեն արեւմտահայերէնին.

         —Այսօր նոր զտեստդ հագի՛ր:

         —Անոնց կիները մուշտակ կը հագնին:

        —Հագաւ Դաւիթ զէնք ու զրահ:

        —Սեւ ու փայլփլուն կօշիկներ  հագան: 

        բ) Ունի նաեւ հագնուել, որ չէզոք է եւ կը համապատասխանէ արեւմտահայերէնի հագուիլ-ին. երկուքն ալ զրկուած են  ուղիղ խնդիր առնելէ. օրինակ

        —Շտապ հագնուեց ու փողոց վազեց:

        —Վասակը սկսաւ արագ հագնուել:

        —Ամառ-ձմեռ նա միատեսակ կը հագնուի:

        —Ներս մի՛ գար, դեռ հագնուած չեմ:

        Ասոնց դիմա, ուրեմն, արեւմտահայերէնը կը դնէ հագուիլ. այսպէս՝

        —Շտապ հագուեցաւ ու փողոց վազեց:

        —Վասակը սկսաւ արագ հագուիլ:

        —Ամառ-ձմեռ ան միատեսակ կը հագուի:

        —Ներս մի՛ գար, դեռ հագուած չեմ:

        գ) Ուրեմն այս երկուքէն բացի՝ արեւմտահայերէնը ունի հագնուիլ կրաւորականը, որ կը սերի  հագնիլ ներգործականէն եւ կը պակսի արեւելահայերէնին. այսպէս

        —Այս կօշիկը շատ հին է ու այլեւս չի հագնուիր:

        —Նման տաք վերարկուն միայն ձմեռը կը հագնուի:

ԳԷՈՐԳ ՔԷՕՇԿԷՐԵԱՆ

«Զարթօնք»ի Երէց Աշխատակից

14 Տարեկան Մանչուկը՝ Թեկնածո՞ւ…

Միացեալ Նահանգներու նախագահ կրնայ ըլլալ այն անձը, որ ծնած է Միացեալ Նահանգներ եւ թեւակոխած 35 տարիքը։ Նահանգներն ալ իրենց կարգին ունին պայմաններ, զորս լրացնելէ ետք միայն կրնայ անձ մը դիմել այդ նահանգի կառավարիչի պաշտօնին։

Օրինակի համար, Գալիֆորնիոյ նահանգի կառավարիչի պաշտօնին տիրանալու համար անձ մը պէտք է գոնէ հինգ տարի բնակած ըլլայ այդ նահանգին մէջ եւ թեւակոխած 18 տարիքը: Իսկ Գալիֆորնիոյ մերձակայ Արիզոնա նահանգի կառավարիչ ըլլալու նուազագոյն տարիքն է 30-ը։

Գալով Վըրմանթ նահանգին՝ դժբախտաբար թէ բարեբախտաբար, այդ նահանգի կառավարիչ դառնալու նուազագոյն տարիքի պայմանը չկայ իր սահմանդրութեան մէջ։ Ուստի, ոեւէ տարիքի անձ մը կրնայ իր թեկնածութիւնը առաջադրել այդ նահանգի կառավարիչի պաշտօնին։

Եւ ահա վերջերս  ճիշդ այդպէս ալ եղաւ։ Արդարեւ, 14 ամեայ մի ոմն՝ Իթհըն Սանպորն (տես նկարը) իր թեկնածութիւնը դրած էր այդ նահանգի կառավարիչի պաշտօնին։ Նախնական ընտրութիւնները (primary elections) տեղի ունեցան Օգոստոս 14-ին, եւ իրեն հետ կային նաեւ երեք այլ թեկնածուներ։

Թեկնածութեան իր յայտարարութեան մէջ Իթհըն կ’ըսէ. «Ես թէեւ տարիքով փոքր եմ, սակայն պէտք է մարդիկ լուրջի առնեն զիս, որովհետեւ ունիմ գործնական եւ յառաջդիմական գաղափարներ նահանգի ղեկավարման համար»։ Ան իր ընտրապայքարին համար գոյացուցած էր 1.700 տոլար, որ չնչին գումար մըն է՝ նկատի ունենալով ծախս մը, որ կը հասնի հարիւրաւոր հազար տոլարի։ 

Անշուշտ Իթհըն չշահեցաւ ընտրութիւնը։ Սակայն գնահատելի է  անոր յանդուգն քայլը, մանաւանդ անոր հասունութիւնը քաղաքական ասպարէզի ըմբռնումին տեսակէտէն եւ հետեւողական աշխատանքը այդ պաշտօնին տիրանալու։ Վստահ եմ, Իթհըն պիտի չգոհանայ այսքանով եւ պիտի շարունակէ ձգտիլ իր երազին հասնելու համար։ Ես ի սրտէ յաջողութիւն կը մաղթեմ անոր եւ կը փափաքիմ, որ ուրիշներ ալ որդեգրեն նոյն ուղին։

Հասարակ Յայտարար…

Այս եզրաբանութիւնը ընդհանրապէս կը գործածուի թուաբանութեան մէջ, երբ կոտրակներով գումարում կամ հանում կը կատարենք։ Սակայն մեր այսօրուան պատմութեան մէջ զայն պիտի կիրարկենք մարդուն համար։ Հիմա թոյլ տուէք բացատրեմ։

Եօթը ընտանիքներ՝ երկուքը Թեքսասէն, երկուքը՝ Նիւ Եորքէն, մէկը՝ Գալիֆորնիայէն, մէկը՝ Գոլորատոյէն եւ մէկն ալ Նիւ Ճըրզիէն, տարին մէկ անգամ կը հաւաքուին եւ լաւ ժամանակ կ’անցընեն։ Բայց ինչո՞ւ այս տարօրինակ հաւաքոյթը…

Այդ եօթը ընտանիքներուն տասը զաւակները (3-5 տարեկան) խորթ քոյրեր եւ եղբայրներ են։ Այսինքն՝ անոնք սերած են նոյն մարդուն սերմէն, եւ ահաւասիկ հասարակ յայտարարը անոնց միջեւ։ Ուրեմն տարեկան այդ հաւաքոյթին նպատակն է ծանօթացում մը ստեղծել եւ յարաբերութիւն մշակել այդ հարազատներուն միջեւ։

Հետաքրքրական է գիտնալ, որ այդ եօթը ընտանիքները (տես նկարը) համացանցի միջոցաւ (donor sibling registry) ծանօթացած են իրարու եւ վերահասու դարձած, որ իրենց զաւակները ազգականական կապ մը ունին իրարու հետ։

Իսկ տասը զաւակներու հօր ինքնութիւնը թաքուն կը պահուի Վըրճինիա նահանգի Ֆէրֆէքս գաւառի Sperm bank-ին կողմէ, մինչեւ որ այդ զաւակները 18 տարիքը թեւակոխեն եւ յաչս օրէնքի իրաւունք ունենան բացայայտելու անոր ինքնութիւնը, եթէ փափաքին։ Մինչ այդ, այդ մարդը կը ճանչցուի որպէս donor 401.

Հաւանաբար կ’ուզէք գիտնալ, թէ այդ սերմը որքա՛ն կ’արժէ, չէ՞։ Ուրեմն ըսեմ ձեզի թէ անոր արժէքն է 425 տոլար։ Անշուշտ այդ գումարին մէկ մասն է, որ սերմը նուիրողին կը տրուի, իսկ մնացեալը՝ սերմը պահող դրամատան։