22 Մարտ 2025-ին Լիբանանի մէջ ՀՀ դեսպան Վահագն Աթաբէկեան՝ դեսպանութեան ռազմական կցորդ գնդապետ Արթուր Դալիբալթեանի և դեսպանութեան խորհրդական Ստեփան Գէորգեանի ուղեկցութեամբ, այցելեց Լիբանան-Իսրայէլ սահմանագիծին վրայ ծառայող ԵՈՒՆԻՖԻԼ-ի կեդրոնատեղին, մասնակցելու հայկական զօրախումբին հերթափոխի արարողութեան:
Այնտեղ, դեսպանը հանդիպում ունեցած է ԵՈՒՆԻՖԻԼ-ի Արևմտեան զօրաբաժնին հրամանատար, զօրախումբի գեներալ Նիքոլա Մանտոլեզիին հետ: Իտալացի գեներալը բարձր գնահատած է ՀՀ զօրախումբին ծառայութիւնը Լիբանան-Իսրայէլ առճակատումի թէժ շրջանին մէջ, յատկապէս նշելով, որ հայկական զօրախումբը շարունակած է իրականացնել զօրանոցի պահակային ծառայութիւնը նոյնիսկ այն ժամանակ, երբ այլերկրացի խաղաղապահներուն մեծ մասը գտնուած են զինուորական ապաստանարաններուն մէջ:
Դեսպան Աթաբէկեանը ողջունած է հայ խաղաղապահներուն, շնորհակալութիւն յայտնելով գերազանց ծառայութեան և Լիբանանի կայունութեան և խաղաղութեան հաստատման ի խնդիր, իրենց գործօն մասնակցութեան համար:
Յիշեցնենք, որ ՀՀ զինուած ուժերը միջազգային խաղաղապահ առաքելութեամբ հանդէս սկսած են գալ 2004-ի Փետրուարէն ի վեր: Հայ խաղաղապահները մինչեւ օրս ծառայած են ու կը շարունակեն ծառայել, Քոսովոյի, Իրաքի, Աֆղանիստանի, եւ Լիբանանի մէջ, ուր 2014-ի Դեկտեմբերէն ի վեր 32 զինծառայողներէ բաղկացած հայկական դասակի մասնակցութեամբ, որոնք ընդգրկուեցան իտալական զօրախումբի կազմին մէջ, սկիզբ դրուեցաւ ՄԱԿ-ի հովանիին ներքեւ ԵՈՒՆԻՖԻԼ-ի խաղաղապահ առաքելութեան:
Հպարտութեամբ աւելցնենք, որ Հայ խաղաղապահները միշտ մասնակցած են են միջազգային բազմաթիւ և բազմազգ զորավարժութիւններու` միշտ բարձր պահելով հայ զինծառայողի պատիւը և արժանանալով վերադաս հրամանատարութեան, ինչպէս նաև տարբեր երկիրներու բարձրաստիճան զինուորականներուն գովեստին և պարգևներուն:
