Երեքշաբթի, 25. 06. 2024

spot_img

Թող Ամենակալն Աստուած Իր Պահպանութիւնն Ու Զօրակցութիւնը Շնորհի Հայոց Բանակի Քաջարի Զինուորներին ու Հրամանատարական Կազմին

Մայր Աթոռ Սուրբ Էջմիածնից Հայոց բանակի օրուայ առիթով Հայրապետական Մեր օրհնութիւնն ու բարեմաղթանքն ենք բերում Հայոց բանակի սպաներին ու զինուորներին եւ համայն մեր ժողովրդին:

       Հայոց բանակը կազմաւորուեց մեր անկախութեան վերահաստատման տարիներին, դարձաւ պատուարն ու պահապանը հայոց վերածնեալ պետականութեան, երաշխաւորը մեր ժողովրդի խաղաղ ու անվտանգ կեանքի: Մեր խիզախ զօրավարների ու զինուորների քաջագործութիւններով, նաեւ բանակին սատարող մեր ժողովրդի պայքարով ազատագրուեց Արցախ աշխարհը, եւ արցախահայութիւնը իր անկախ կեանքը կառուցելու հնարաւորութիւնն ունեցաւ:

       Արցախեան 44-օրեայ աղէտալի պատերազմը, անցեալ տարուայ սեպտեմբերին Հայաստանի սահմանների նկատմամբ ոտնձգութիւնները, յառնած մարտահրաւէրները եւ պաշտպանական լրջագոյն հիմնահարցերը նոր հրամայականների առջեւ են կանգնեցրել մեր երկիրն ու ժողովրդին: Այս ծանր իրավիճակում առաջնային եւ հրատապ է բանակի արդիականացումը` ժամանակի չափանիշներին ու պահանջներին համապատասխան: Առաջնային եւ հրատապ է ազգային ողջ ներուժի համախմբումը, որպէսզի Հայոց բանակը շուտափոյթ յաղթահարի պատերազմի պատճառած աղէտալի հետեւանքները, ամոքում գտնեն անդառնալի կորուստների վէրքերն ու ցաւերը, եւ բացառուեն այնպիսի ողբերգութիւններ, որ ապրեցինք շաբաթներ առաջ: Հաւատում ենք, որ Հայոց բանակը պիտի վերագտնի փառքի իր ճանապարհը եւ կարող լինի աննկուն ու յաղթական իրագործել իր սրբազան առաքելութիւնը:

       Ի խորոց սրտի աղօթում ենք հայրենիքի պաշտպանութեան համար նահատակութեան պսակն ընդունած բոլոր քաջորդիների համար: Հայցում ենք Երկնաւորից, որ մխիթարութիւն պարգեւի կորուստներից ու վշտերից բեկուած հոգիներին: Թող Ամենակալն Աստուած Իր պահպանութիւնն ու զօրակցութիւնը շնորհի Հայոց բանակի քաջարի զինուորներին ու հրամանատարական կազմին, խաղաղութիւն ու բարօրութիւն` Հայաստան ու Արցախ մեր հայրենիքին եւ աշխարհասփիւռ մեր ժողովրդին:

       «Շնորհք ընդ ձեզ եւ խաղաղութիւն յԱստուծոյ Հօրէ մերմէ եւ ի Տեառնէ Յիսուսէ Քրիստոսէ» (Հռոմ. 1.7) այսօր եւ միշտ. ամէն:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին