Ամէն իրավիճակի հետ համակերպող լիբանանցին դարձեալ յայտնուեցաւ առանց նախագահի երկրի մը մէջ երբ շրջանաւարտ նախագահ՝ Միշէլ Աուն հրաժեշտ տուաւ նախագահական պալատին:
Առաջին անգամը չէ, որ այս երեւոյթը կ՛ապրի երկիրը, սակայն սոյն պարագան եթէ գումարենք ներկայ աննախընթաց ճգնաժամին վրայ, ապա վիճակը իրապէս անմխիթար կը դառնայ:
Աւելի ցաւալին այն է, որ հակառակ նախագահական ընտրութիւններու քանի մը անգամ կրկնուած բեմադրութիւններուն, խորհրդարանը չկրցաւ նախագահ ընտրել, մինչ ակնկալելի էր, որ գոնէ նկատի ունենալով երկրին իրավիճակը խորհրդարանը կատարէր իր ազգային պարտականութիւնը, շրջանցելու համար նախագահական հաստատութեան թափուրը մինչ երկիրը կը տուայտի պետական գրեթէ բոլոր հաստատութիւններուն անգործութենէն:
Նշենք, թէ Աուն իր պաշտօնը չլքած վաւերացուց նաեւ նախարարաց խորհուրդի հրաժարականը:
