Լիբանանի տարածքին գործող դպրոցները երկու շաբաթէ ի վեր անընդմէջ փակ կը պահեն իրենց դռները եւ պիտի շարունակեն նոյնը ընել առնուազն մինչեւ այս ամսուայ աւարտը անսալով կառավարութեան որոշումներուն:
Ապահովելու համար աշակերտներուն ուսումնառութիւնը Կրթութեան Նախարար Թարէք Մաժզուպ Երեքշաբթի օր շարք մը որոշումներու մասին յայտարարեց, որոնք պիտանի են ուսուցումը արտադասարանային միջոցներով յառաջ տանիլ: Որոշումները կը միտին փրկել ուսումնական տարին:
Ըստ նախարարին Մայքրոսոֆթ ընկերութիւնը պիտի օժանդակէ ելեկտրոնային ուսուցման գործընթացին Լիբանանի ամբողջ տարածքին: Ծրագիրը պիտի օգնէ աշակերտին հաղորդակցութեան մէջ մտնել դաստիարակին կամ ուսուցիչին հետ եւ ստանալ պարտականութիւններու յանձնել քննութիւններ:
Դպրոցի տնօրէններ մշտական կապի մէջ պիտի ըլլան Կրթութեան նախարարութեան հետ խորհրդակցելու այս միջոցառումին օգտակարութեան արդիւնքներուն մասին:
Վերոյիշեալը հանրային դպրոցներու պարագային: Ինչ կը վերաբերի սեփական վարժարաններուն, անոնցմէ շատեր այս միջոցին արդէն դիմած էին նախապէս:
