Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ Հայաստանի եպիսկոպոսները քորոնավիրուսի համավարակի վերաբերեալ մարտի 13-ին հանդէս են եկել հետեւեալ յայտարարութեամբ.
«Մտահոգութեամբ ենք անդրադառնում աշխարհում, ինչպէս եւ մեր երկրում քորոնավիրուսի համավարակի հետեւանքով ստեղծուած կացութեանը: Աղօթում ենք համավարակից մահացածների հոգիների հանգստութեան համար, մեր զօրակցութիւնը բերում նրանց ընտանիքներին եւ շուտափոյթ ապաքինում մաղթում բոլոր հիւանդներին:
Յորդորում ենք մեր ժողովրդի զաւակներին հանդէս բերել առաւելագոյն զգօնութիւն ու պատասխանատուութիւն, հետեւողականութեամբ ու ամենայն լրջութեամբ պահպանել մասնագիտացուած կառոյցների կողմից սահմանուած պահանջներն ու ցուցումները եւ իրականացնել համավարակի կանխարգելման բոլոր միջոցառումները:
Մեր Եկեղեցին միշտ իրականացրել է իր հոգեփրկչական ծառայութիւնը եւ այսօր եւս շարունակելու է տէրունապատուէր իր առաքելութեան բնականոն ընթացքը` հոգեւոր խնամք մատուցելով իր հաւատաւոր զաւակներին, քաջալերելով ամուր մնալու հաւատքի մէջ, առ Աստուած հաւատքով եւ աղօթքով դիմագրաւելու դժուարութիւններն ու նեղութիւնները։
Աղօթք ենք բարձրացնում աշխարհի խաղաղութեան, մարդկութեան առաջ յառնած վտանգների ու սպառնալիքների շուտափոյթ յաղթահարման համար: Հայցում ենք նաեւ Տիրոջ օգնականութիւնն առողջութեան եւ կազդուրման կարիք ունեցողներին, իրենց տքնաջան ծառայութիւնը բերող բժիշկներին եւ առողջապահութեան ոլորտի կարեւոր սպասաւորութեան մէջ ներգրաւուած բոլոր անձանց:
Թող մեր Տէր Յիսուս Քրիստոսի սէրը, շնորհները եւ ամենառատ ողորմութիւնը լինեն բոլորի հետ. ամէն»։
