Պէյրութի Ռաֆիք Հարիրիի անուան պետական հիւանդանոցը պսակաձեւ ժահրով վարակուածներու 4 նոր պարագաներու իր մօտ գրանցումին մասին յայտարարութիւն տարածեց: Այս յայտարարութեամբ Լիբանանի մէջ պաշտօնապէս գրանցուածներու թիւը հասաւ 32-ի:
Աւելի առաջ Լիբանանի առողջապահութեան նախարար Համատ Հասանի վկայութեամբ, երկրին մէջ պսակաձեւ ժահրի վարակը մտած է նոր տարածման փուլ մը, որ կրնայ համատարած համաճարակի վերածուիլ։
Նախարարը, որ խօսած է ընդհանուր իրավիճակին մասին նաեւ նշած է, որ դիմած է Լիբանանի առողջապահական ոլորտի բոլոր հաստատութիւններուն եւ գործիչներուն եւ անոնցմէ պահանջած առաւելագոյնի հասցնել սոյն ժահրին դէմ պայքարի համար ձեռք առնուող միջոցառումները։
Ամէն օր նոր պարագաներու արձանագրութիւնը մղած է նախարարին, որ հաստատէ, թէ վարակը մտած է արագ տարածման վտանգաւոր եւ մտահոգիչ փուլը։
Այս բոլորի լոյսին տակ Լիբանանի պատկան մարմիններ կը փորձեն պայքարիլ վարակի տարածման դէմ։ Այս պատճառով Լիբանանի տարածքին գործող ուսումնական հաստատութիւնները շաբաթ մը եւս փակ պիտի մնան՝ մինչեւ 15 Մարտ:
