ՀՀ տարածքային կառավարման և ենթակառուցվածքների նախարար, Սահմանադրության փոփոխությունների «Այո»-ի շտաբի պետ Սուրեն Պապիկյանը բացառում է, որ կարող է համայնքապետերին հրահանգվել` աշխատել «Այո»-ի օգտին: «Արմենպրես»-ի փոխանցմամբ` այս մասին Պապիկյանն ասաց խորհրդարանում հարցուպատասխանի ընթացքում, պատասխանելով «Իմ քայլը» խմբակցության պատգամավոր Հայկ Գևորգյանի հարցին:
«Եթե կան այդպիսի փաստեր, խնդրում ենք ներկայացնել, բարձրաձայնել, անվանական նշել այն մարդկանց, որոնք նման քայլերի են դիմել: Ես բացառում եմ, որ մեր քաղաքական ուժի, «Այո» շտաբի, առավել ևս` Տարածքային կառավարման նախարարի կամ նախարարության որևէ ներկայացուցչի կողմից կարող է լինել նման հրահանգ: Նման հրահանգ չի եղել: Նաև հայտարարել եմ, որ որևէ համայնքապետ թող իշխանությանն արջի ծառայություն չմատուցի»,- ասաց Պապիկյանը:
Սահմանադրության փոփոխությունների հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը: Սահմանադրության փոփոխությունների հանրաքվեն տեղի կունենա ապրիլի 5-ին: Սահմանադրության փոփոխությունների հանրաքվեի նախընտրական քարոզարշավը մեկնարկել է փետրվարի 17-ին:
