Երեքշաբթի, 18. 06. 2024

spot_img

Միջազգային Միջ-Եկեղեցական Համագումարը Իր Աւարտին Հասաւ Անթիլիասի Մէջ

Երեք օրերու վրայ տարածուած Անթիլիասի Մայրավանքին մէջ գումարուող միջազգային համագումարը հասաւ իր աւարտին կիրակի օր: Յայտնենք, որ Ն.Ս.Օ.Տ.Տ. Արամ Ա. Վեհափառ Հայրապետին նախաձեռնութեամբ եւ նախագահութեամբ տեղի ունեցած համագումարին նպատակն էր միջ-եկեղեցական շարժումին համար նոր տեսլական մը զարգացնել՝ համահունչ ներկայ ժամանակներու եւ եկեղեցիներու դիմագրաւած մարտահրաւէրներուն:

Երեք օրեր շարունակ յիշեալ թեմային շուրջ երկար տարիներու միջ-եկեղեցական ծառայութիւն ունեցող 30 անձեր քննարկեցին համագումարին թեման, Նորին Սրբութեան տուած դասախօսութեան, ինչպէս նաեւ եկեղեցիներու ու շրջանային խորհուրդներու մօտեցումները պարզող տրուած զեկոյցներու լոյսին տակ: Ապա, միջ-եկեղեցական շարժումին ապագային նկատմամբ իր տեսակէտները ներկայացուց Եկեղեցւոյ Համաշխարհային Խորհուրդի նախկին ընդհանուր քարտուղար Դոկտ. Ք. Րայզըրը:

Համագումարին յայտարարութիւնը պատրաստող յանձնախումբը ներկայացուց ընդհանուր ուրուագիծ մը, որ երկար քննարկումէ յետոյ որդեգրուեցաւ: Նկատի ունենալով կատարուելիք յայտարարութեան յոյժ կարեւոր բնոյթը, որոշուեցաւ զայն պատրաստել ու հրապարակել յառաջիկայ երկու շաբաթներու ընթացքին: Համագումարը իր ջերմ շնորհակալութիւնը յայտնեց Վեհափառ Հայրապետին միջ-եկեղեցական պատմութեան այս վճռական հանգրուանին իր կողմէ առնուած այս կարեւոր քայլին համար եւ առաջարկեց, որ յառաջիկային եւս նման նախաձեռնութիւններու դիմէ Հայրապետը, նկատի ունենալով իր հարուստ փորձառութիւնը եւ միջ-եկեղեցական շարժումի կենսական կարեւորութիւնը ներկայ աշխարհին մէջ:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին